kis haal-e-be-KHudi mein kinare gae the hum

kis hāl-e-be-ḳhudī meñ kināre ga.e the ham

jab zindagī kī samt utāre ga.e the ham

ham par Thahar ga.ī thī sar-e-bazm ik nigāh

kis sādgī se haa.e pukāre ga.e the ham

in nīm-bāz nargisī āñkhoñ se pūchhiye

us raat kis tarah se guzāre ga.e the ham

dhoke se ham se paar karā.ī ga.ī thī raat

ik sub.h kī bisāt pe maare ga.e the ham

is baar maut lāñgh ke jā.eñge shahr-e-ishq

is baar zindagī ke sahāre ga.e the ham

kis haal-e-be-KHudi mein kinare gae the hum

jab zindagi ki samt utare gae the hum

hum par Thahar gai thi sar-e-bazm ek nigah

kis sadgi se hae pukare gae the hum

in nim-baz nargisi aankhon se puchhiye

us raat kis tarah se guzare gae the hum

dhoke se hum se par karai gai thi raat

ek subh ki bisat pe mare gae the hum

is bar maut langh ke jaenge shahr-e-ishq

is bar zindagi ke sahaare gae the hum