kis hawale se mujhe kis ka pata yaad aaya

kis havāle se mujhe kis kā patā yaad aayā

husn-e-kāfir ko jo dekhā to ḳhudā yaad aayā

ek TuuTā huā paimān-e-vafā yaad aayā

yaad aayā bhī mujhe aaj to kyā yaad aayā

shaam ke haath ne jis vaqt lagā lī mehñdī

mujhe us vaqt tirā rañg-e-hinā yaad aayā

kahīñ āñkhoñ kī namī raaz na ifshā kar de

maiñ ne muñh pher liyā tū jo zarā yaad aayā

saare fankār uThā laa.e the shahkāroñ ko

aur maiñ thā mujhe andāz tirā yaad aayā

kitnī duniyā thī mire gird tujhe kyā ma.alūm

baḌī mushkil se mujhe terā patā yaad aayā

tere dāman meñ namī itnī ziyāda kyuuñ hai

kaun sā phuul tujhe bād-e-sabā yaad aayā

jab kisī ko koī ummīd vafāoñ kī na thī

mujhe us pal tirā paimān-e-vafā yaad aayā

qadam uThte the kahāñ sū-e-haram apne 'adīm'

aaj mushkil nazar aa.ī to ḳhudā yaad aayā

kis hawale se mujhe kis ka pata yaad aaya

husn-e-kafir ko jo dekha to KHuda yaad aaya

ek TuTa hua paiman-e-wafa yaad aaya

yaad aaya bhi mujhe aaj to kya yaad aaya

sham ke hath ne jis waqt laga li mehndi

mujhe us waqt tera rang-e-hina yaad aaya

kahin aankhon ki nami raaz na ifsha kar de

main ne munh pher liya tu jo zara yaad aaya

sare fankar uTha lae the shahkaron ko

aur main tha mujhe andaz tera yaad aaya

kitni duniya thi mere gird tujhe kya malum

baDi mushkil se mujhe tera pata yaad aaya

tere daman mein nami itni ziyaada kyun hai

kaun sa phul tujhe baad-e-saba yaad aaya

jab kisi ko koi ummid wafaon ki na thi

mujhe us pal tera paiman-e-wafa yaad aaya

qadam uThte the kahan su-e-haram apne 'adim'

aaj mushkil nazar aai to KHuda yaad aaya