kis hiddat se guzre kaise phul hue

kis hiddat se guzre kaise phuul hue

kyā mausam thā jab angāre phuul hue

chhāchh bilone vaalī muddat baa'd hañsī

dīvāroñ par chaspāñ uple phuul hue

resha buntī makḌī ḳhushbū meñ Duubī

ik aahaT par saare jaale phuul hue

us dar ke phūloñ kā 'ālam kyā hogā

jis ko chhū kar mere jaise phuul hue

ghar ne dekh liyā aate pardesī ko

khil uTThe darvāze taale phuul hue

chauk meñ ik tasvīr lagā.ī phūloñ kī

dekhā dekhī chāroñ raste phuul hue

ham haiñ jin par mā'nī badle jaate haiñ

ham haiñ jin par kankar tere phuul hue

itnī mohlat khilne aur mahakne kī

ġham ne dī aur ham bhī us ke phuul hue

kāñTe us zarḳhez nazar ke shaidā.ī

jo bhī is meñ aan samā.e phuul hue

jab tak harf raheñge tum bhī mahkoge

tum mere ash'ār meñ aa.e phuul hue

kis hiddat se guzre kaise phul hue

kya mausam tha jab angare phul hue

chhachh bilone wali muddat ba'd hansi

diwaron par chaspan uple phul hue

resha bunti makDi KHushbu mein Dubi

ek aahaT par sare jale phul hue

us dar ke phulon ka 'alam kya hoga

jis ko chhu kar mere jaise phul hue

ghar ne dekh liya aate pardesi ko

khil uTThe darwaze tale phul hue

chauk mein ek taswir lagai phulon ki

dekha dekhi chaaron raste phul hue

hum hain jin par ma'ni badle jate hain

hum hain jin par kankar tere phul hue

itni mohlat khilne aur mahakne ki

gham ne di aur hum bhi us ke phul hue

kanTe us zarKHez nazar ke shaidai

jo bhi is mein aan samae phul hue

jab tak harf rahenge tum bhi mahkoge

tum mere ash'ar mein aae phul hue