kis jins ka hua hun KHaridar dekhna

kis jins kā huā huuñ ḳharīdār dekhnā

saude kī mere garmī-e-bāzār dekhnā

kaisī aqūbateñ haiñ dil-e-zār dekhnā

marnā bhī aur us ko azā-dār dekhnā

fasl-e-ḳhizāñ meñ dil jo rihā ho gayā to kyā

aane do phir bahār-e-giraftār dekhnā

pāmāl ek ḳhalq huī har qadam ke saath

ai dil butoñ kī shoḳhī-e-raftār dekhnā

maane adab hai varna abhī khīñch luuñ naqāb

mushkil nahīñ hai kuchh tujhe dildār dekhnā

kaafī hai bazm-e-ġhair meñ mujh par nigāh-e-lutf

haañ naza.a meñ hai pursish-e-bīmār dekhnā

hasrat-fazā-e-koh-kan-e-be-navā kī maut

jā-e-kafan hai dāman-e-kohsār dekhnā

dil meñ hazār daaġh haiñ zauq-e-kalīm ke

nazzārgī kī hasrat-e-dīdār dekhnā

kis ne hayā se nīchī nazar kī ki ho gayā

āsāñ na dekhnā mujhe dushvār dekhnā

dekhā ye ḳhvāb meñ to ye hai ālam-e-ḳhayāl

be-ḳhvāb us ko dīda-e-bedār dekhnā

ā.īna-vār dīda-e-dil terī samt hai

is hairatī ko apne zarā yaar dekhnā

vo dekhte haiñ bazm meñ ye dekhtā hai kyoñ

baare huā mujhe bhī sazā-vār dekhnā

allāh re 'zakī' ki kiyā tark-e-dīn-o-dil

chhoḌā magar butoñ ko na zinhār dekhnā

kis jins ka hua hun KHaridar dekhna

saude ki mere garmi-e-bazar dekhna

kaisi aqubaten hain dil-e-zar dekhna

marna bhi aur us ko aza-dar dekhna

fasl-e-KHizan mein dil jo riha ho gaya to kya

aane do phir bahaar-e-giraftar dekhna

pamal ek KHalq hui har qadam ke sath

ai dil buton ki shoKHi-e-raftar dekhna

mane adab hai warna abhi khinch lun naqab

mushkil nahin hai kuchh tujhe dildar dekhna

kafi hai bazm-e-ghair mein mujh par nigah-e-lutf

han naza mein hai pursish-e-bimar dekhna

hasrat-faza-e-koh-kan-e-be-nawa ki maut

ja-e-kafan hai daman-e-kohsar dekhna

dil mein hazar dagh hain zauq-e-kalim ke

nazzargi ki hasrat-e-didar dekhna

kis ne haya se nichi nazar ki ki ho gaya

aasan na dekhna mujhe dushwar dekhna

dekha ye KHwab mein to ye hai aalam-e-KHayal

be-KHwab us ko dida-e-bedar dekhna

aaina-war dida-e-dil teri samt hai

is hairati ko apne zara yar dekhna

wo dekhte hain bazm mein ye dekhta hai kyon

bare hua mujhe bhi saza-war dekhna

allah re 'zaki' ki kiya tark-e-din-o-dil

chhoDa magar buton ko na zinhaar dekhna