kis ka aks numayan hoga aise gadle pani mein

kis kā aks numāyāñ hogā aise gadle paanī meñ

sūraj Duub gayā hai mere āñgan kī vīrānī meñ

is ghar kī dīvār meñ jaane kis ke kaan phañse hoñge

sirf yahī Dar lāhiq hai mujh ko har naql-e-makānī meñ

hijr kī shab raushan thā ghar meñ ek sitāra aur charāġh

aañkh jhapakne tak kā vaqt nahīñ thā is hairānī meñ

mujh se pahle bhī kuchh vahshī is uljhan meñ faut hue

āḳhir kis kā dast-e-junūñ hai vahshat kī āsānī meñ

surḳh añdherā chhaTne kī minnat kā phīkā zard charāġh

chhoḌ diyā hai saañp kisī ne jhiil ke saada paanī meñ

jaise kisī ne bachchoñ vaale ghar meñ saañp ko rakhnā ho

aise mujhe Dar lagtā hai is hijrāñ kī nigarānī meñ

kis ka aks numayan hoga aise gadle pani mein

suraj Dub gaya hai mere aangan ki virani mein

is ghar ki diwar mein jaane kis ke kan phanse honge

sirf yahi Dar lahiq hai mujh ko har naql-e-makani mein

hijr ki shab raushan tha ghar mein ek sitara aur charagh

aankh jhapakne tak ka waqt nahin tha is hairani mein

mujh se pahle bhi kuchh wahshi is uljhan mein faut hue

aaKHir kis ka dast-e-junun hai wahshat ki aasani mein

surKH andhera chhaTne ki minnat ka phika zard charagh

chhoD diya hai sanp kisi ne jhil ke sada pani mein

jaise kisi ne bachchon wale ghar mein sanp ko rakhna ho

aise mujhe Dar lagta hai is hijran ki nigarani mein