کس کارن اتنے رنگوں سے یاری کس کارن یہ ڈھنگ

کس کارن اتنے رنگوں سے یاری کس کارن یہ ڈھنگ

جتنے رنگ بھی چاہو زیست میں بھر لو موت کا ایک ہی رنگ

نام و نمود سے اتنی دوری ٹھیک ہے لیکن آخر کیوں

سارے جہاں سے قوس قزح کا رشتہ اپنے آپ سے جنگ

پل میں دھجی دھجی بکھرنے والی ایسی ہے یہ زیست

اک سے زیادہ بچوں کے ہاتھوں میں جیسے کٹی پتنگ

عمر بتا دی اپنوں اور غیروں کے نقش بنانے میں

جب اپنی تصویر بنانا چاہی پھیکے پڑ گئے رنگ

میں اک لکھنے والا مجھ کو بتانا یار احمد پرویزؔ

لوح و قلم سے آگے بھی ہے کیا یہ دنیا اتنی تنگ