kis KHarabi se main us dar tak gaya

kis ḳharābī se maiñ us dar tak gayā

raah meñ gir gir paḌā thak thak gayā

ho ga.e aise junūñ meñ ham za.iif

haath mushkil se garebāñ tak gayā

ḳhāksārī hai ma.āl-e-puḳhtagī

shāḳh se Tapkā jo meva pak gayā

zo.af-e-pīrī kā sabab hai tūl-e-umr

duur manzil thī musāfir thak gayā

chup ho ai nāseh bahut bāteñ na kar

terī garmī se kalejā pak gayā

zaar huuñ saaqī karūñ kyā ḳhum se ḳhum

pī ke mai maiñ ek qatra chhak gayā

gāliyāñ diiñ aap ne achchhā kiyā

thā jo hone meñ dahan ke shak gayā

ho ga.e ġham se sarāpā daaġh ham

kyā siyah-rūī kā parda Dhak gayā

ab ġhizā kī kyā mujhe parvā rahe

luqma-e-ġham khāte khāte chhak gayā

tang ho kar kyoñ na de mujh ko fishār

gor ke ghar meñ maiñ be-dastak gayā

manzil-e-ulfat karegā kaun tai

do qadam chal kar musāfir thak gayā

kyā Thikāna lafz-o-mazmūñ kā 'asīr'

muñh meñ jo aaya maiñ vahshī bak gayā

kis KHarabi se main us dar tak gaya

rah mein gir gir paDa thak thak gaya

ho gae aise junun mein hum zaif

hath mushkil se gareban tak gaya

KHaksari hai maal-e-puKHtagi

shaKH se Tapka jo mewa pak gaya

zoaf-e-piri ka sabab hai tul-e-umr

dur manzil thi musafir thak gaya

chup ho ai naseh bahut baaten na kar

teri garmi se kaleja pak gaya

zar hun saqi karun kya KHum se KHum

pi ke mai main ek qatra chhak gaya

galiyan din aap ne achchha kiya

tha jo hone mein dahan ke shak gaya

ho gae gham se sarapa dagh hum

kya siyah-rui ka parda Dhak gaya

ab ghiza ki kya mujhe parwa rahe

luqma-e-gham khate khate chhak gaya

tang ho kar kyon na de mujh ko fishaar

gor ke ghar mein main be-dastak gaya

manzil-e-ulfat karega kaun tai

do qadam chal kar musafir thak gaya

kya Thikana lafz-o-mazmun ka 'asir'

munh mein jo aaya main wahshi bak gaya