kis ki aankhon ki hidayat se mujhe dekhta hai

kis kī āñkhoñ kī hidāyat se mujhe dekhtā hai

ā.īna apnī firāsat se mujhe dekhtā hai

jab se utre haiñ mire dil pe ye ālām-e-zamīñ

āsmāñ jhuk ke rifāqat se mujhe dekhtā hai

maiñ gunahgār huuñ āñkhoñ meñ abhī tak apnī

jaane vo kis kī niyābat se mujhe dekhtā hai

mā.il-e-raqs nahīñ paañv meñ zanjīr nahīñ

phir bhī zindāñ hai ki vahshat se mujhe dekhtā hai

ek din Daalī thī buniyād mashaqqat kī yahāñ

ab ye sahrā bhī mohabbat se mujhe dekhtā hai

dil kī āvāz pe niklā thā baġhāvat ke liye

shahr kā shahr himāyat se mujhe dekhtā hai

raushnī chhā.ī huī rahtī hai ab mujh pe 'tarāz'

koī to hai jo ināyat se mujhe dekhtā hai

kis ki aankhon ki hidayat se mujhe dekhta hai

aaina apni firasat se mujhe dekhta hai

jab se utre hain mere dil pe ye aalam-e-zamin

aasman jhuk ke rifaqat se mujhe dekhta hai

main gunahgar hun aankhon mein abhi tak apni

jaane wo kis ki niyabat se mujhe dekhta hai

mail-e-raqs nahin panw mein zanjir nahin

phir bhi zindan hai ki wahshat se mujhe dekhta hai

ek din Dali thi buniyaad mashaqqat ki yahan

ab ye sahra bhi mohabbat se mujhe dekhta hai

dil ki aawaz pe nikla tha baghawat ke liye

shahr ka shahr himayat se mujhe dekhta hai

raushni chhai hui rahti hai ab mujh pe 'taraaz'

koi to hai jo inayat se mujhe dekhta hai