kis ki aankhon mein raqam dil ki hikayat karte

kis kī āñkhoñ meñ raqam dil kī hikāyat karte

koī thā hī nahīñ aisā ki mohabbat karte

itne masrūf the ham ḳhud meñ ki fursat na milī

dost karte jo kisī ko to 'adāvat karte

jab rasā.ī nahīñ mumkin thī tirī ḳhalvat tak

aur kyā karte agar ham na siyāsat karte

tum ne chāhā na mudāvā-e-ġham-e-shām-e-firāq

varna tum kuchh to na aane kī vazāhat karte

zer-e-lab nīm-tabassum se vo detā thā javāb

āñkhoñ āñkhoñ meñ kabhī ham jo sharārat karte

muntazir rahtī mirī ḳhaak bhī sar-tā-ba-qadam

tum kabhī aañkh uThāne kī to zahmat karte

shāyad aglī kisī manzil pe kushāda ho zamīñ

kaT ga.ī 'umr isī soch meñ hijrat karte

kis ki aankhon mein raqam dil ki hikayat karte

koi tha hi nahin aisa ki mohabbat karte

itne masruf the hum KHud mein ki fursat na mili

dost karte jo kisi ko to 'adawat karte

jab rasai nahin mumkin thi teri KHalwat tak

aur kya karte agar hum na siyasat karte

tum ne chaha na mudawa-e-gham-e-sham-e-firaq

warna tum kuchh to na aane ki wazahat karte

zer-e-lab nim-tabassum se wo deta tha jawab

aankhon aankhon mein kabhi hum jo shararat karte

muntazir rahti meri KHak bhi sar-ta-ba-qadam

tum kabhi aankh uThane ki to zahmat karte

shayad agli kisi manzil pe kushada ho zamin

kaT gai 'umr isi soch mein hijrat karte