kis ki KHalwat se nikhar kar subh-dam aati hai dhup

kis kī ḳhalvat se nikhar kar sub.h-dam aatī hai dhuup

kaun vo ḳhush-baḳht hai jis kī mulāqātī hai dhuup

dīdanī hotā hai do rañgoñ kā is dam imtizāj

būñdiyoñ ke ham-jilau ham-raqs jab aatī hai dhuup

tum to pyāre chaḌhte sūraj ke parastāroñ meñ the

kyuuñ ho shikva-sanj agar tan ko jalā jaatī hai dhuup

ḳhushbū-e-mahbūs ko āzād karne ke liye

laakh ho sañgīñ hisār-e-kohar dar aatī hai dhuup

is galī meñ jaise us kā dāḳhila mamnūa ho

yuuñ dabe paañv yahāñ aa kar guzar jaatī hai dhuup

rāt-bhar pahlū meñ rahtā hai munavvar āftāb

din se baḌh kar apnī garmī shab ko dikhlātī hai dhuup

dil ḳhushī se jhūmtā hai jab sar-e-dīvār-e-yār

nīm-vā dar se guzar kar sard ban jaatī hai dhuup

raat pahlū meñ achānak us kā chehra dekh kar

dil meñ ye aayā tasavvur kitnī lamhātī hai dhuup

barq ke dam se thī kal jis ḳhvāb-gah meñ mauj-e-nūr

ab vahāñ bhī tarz-e-nau se jalva dikhlātī hai dhuup

ai 'suhail' is meñ nihāñ hai us kī mahbūbī kā raaz

tab-e-mausam dekh kar fauran badal jaatī hai dhuup

kis ki KHalwat se nikhar kar subh-dam aati hai dhup

kaun wo KHush-baKHt hai jis ki mulaqati hai dhup

didani hota hai do rangon ka is dam imtizaj

bundiyon ke ham-jilau ham-raqs jab aati hai dhup

tum to pyare chaDhte suraj ke parastaron mein the

kyun ho shikwa-sanj agar tan ko jala jati hai dhup

KHushbu-e-mahbus ko aazad karne ke liye

lakh ho sangin hisar-e-kohar dar aati hai dhup

is gali mein jaise us ka daKHila mamnua ho

yun dabe panw yahan aa kar guzar jati hai dhup

raat-bhar pahlu mein rahta hai munawwar aaftab

din se baDh kar apni garmi shab ko dikhlati hai dhup

dil KHushi se jhumta hai jab sar-e-diwar-e-yar

nim-wa dar se guzar kar sard ban jati hai dhup

raat pahlu mein achanak us ka chehra dekh kar

dil mein ye aaya tasawwur kitni lamhati hai dhup

barq ke dam se thi kal jis KHwab-gah mein mauj-e-nur

ab wahan bhi tarz-e-nau se jalwa dikhlati hai dhup

ai 'suhail' is mein nihan hai us ki mahbubi ka raaz

tab-e-mausam dekh kar fauran badal jati hai dhup