kis ki khoi hui hansi thi main

kis kī khoī huī hañsī thī maiñ

kis ke hoñToñ pe aa ga.ī thī maiñ

kin zamānoñ pe munkashif huī huuñ

kin zamānoñ kī raushnī thī maiñ

maiñ kisī shaḳhs kī udāsī thī

sard lahje meñ boltī thī maiñ

din Dhale lauTte parindoñ ko

ghar kī khiḌkī se dekhtī thī maiñ

kaash ik baar dekh lete tum

rāste meñ paḌī huī thī maiñ

ab jo afsurdagī kī chādar huuñ

mausam-e-gul kī oḌhnī thī maiñ

ḳhud ko daryāft karne niklī huuñ

ya.anī ḳhud se kahīñ ḳhafī thī maiñ

gungunātā thā shab ke pichhle pahar

jaane kis dil kī rāgnī thī maiñ

phir december thā sard rāteñ thiiñ

shahr sotā thā jāgtī thī maiñ

us ne jab haath haath par rakkhā

surḳh phūloñ se bhar ga.ī thī maiñ

aaj dekhā thā aa.ina maiñ ne

aur phir der tak hañsī thī maiñ

jaane kyā baat yaad aa.ī mujhe

hañste hañste jo ro paḌī thī maiñ

maiñ ne ik shaam pā liyā thā use

us se ik raat kho ga.ī thī maiñ

jāntā kaun mujh ko mere sivā

ghar ke andar bhī ajnabī thī maiñ

merī parteñ nahīñ khulīñ ab tak

devtāoñ kī shā.irī thī maiñ

ḳhud se Takrā ga.ī thī 'jānāñ' kahīñ

apne raste meñ aa ga.ī thī maiñ

kis ki khoi hui hansi thi main

kis ke honTon pe aa gai thi main

kin zamanon pe munkashif hui hun

kin zamanon ki raushni thi main

main kisi shaKHs ki udasi thi

sard lahje mein bolti thi main

din Dhale lauTte parindon ko

ghar ki khiDki se dekhti thi main

kash ek bar dekh lete tum

raste mein paDi hui thi main

ab jo afsurdagi ki chadar hun

mausam-e-gul ki oDhni thi main

KHud ko daryaft karne nikli hun

yani KHud se kahin KHafi thi main

gungunata tha shab ke pichhle pahar

jaane kis dil ki ragni thi main

phir december tha sard raaten thin

shahr sota tha jagti thi main

us ne jab hath hath par rakkha

surKH phulon se bhar gai thi main

aaj dekha tha aaina main ne

aur phir der tak hansi thi main

jaane kya baat yaad aai mujhe

hanste hanste jo ro paDi thi main

main ne ek sham pa liya tha use

us se ek raat kho gai thi main

jaanta kaun mujh ko mere siwa

ghar ke andar bhi ajnabi thi main

meri parten nahin khulin ab tak

dewtaon ki shairi thi main

KHud se Takra gai thi 'jaanan' kahin

apne raste mein aa gai thi main