kis ki taswir se aaina Daraata hai mujhe

kis kī tasvīr se ā.īna Darātā hai mujhe

kaun ye mujh sā hai āñkheñ jo dikhātā hai mujhe

nit-na.e sāhil-o-amvāj dikhātā hai mujhe

ik samundar hai ki har-lahza bulātā hai mujhe

hai nihāñ-ḳhāna-e-ġham us kī hañsī ke pīchhe

hañstā rahtā hai vo ḳhud aur rulātā hai mujhe

rāt-bhar koh-e-nidā se mujhe detā hai sadā

sub.h hote hī bulandī se girātā hai mujhe

ashk ye aur kisī kā hai sar-e-shām-e-umīd

merī āñkhoñ meñ utar kar jo rulātā hai mujhe

kise achchhā kahūñ ab kis ko burā ai 'betāb'

har koī apne hī jaisā nazar aatā hai mujhe

kis ki taswir se aaina Daraata hai mujhe

kaun ye mujh sa hai aankhen jo dikhata hai mujhe

nit-nae sahil-o-amwaj dikhata hai mujhe

ek samundar hai ki har-lahza bulata hai mujhe

hai nihan-KHana-e-gham us ki hansi ke pichhe

hansta rahta hai wo KHud aur rulata hai mujhe

raat-bhar koh-e-nida se mujhe deta hai sada

subh hote hi bulandi se giraata hai mujhe

ashk ye aur kisi ka hai sar-e-sham-e-umid

meri aankhon mein utar kar jo rulata hai mujhe

kise achchha kahun ab kis ko bura ai 'betab'

har koi apne hi jaisa nazar aata hai mujhe