kis kis ko aaj roiye kya kya gaya nahin

kis kis ko aaj roiye kyā kyā gayā nahīñ

kahte haiñ log ghar koī luuTā gayā nahīñ

kahte haiñ jis ko hāsil-e-bahbūdī-e-hayāt

aisā koī savāl uThāyā gayā nahīñ

merā bhī zikr-e-ḳhair ho har bazm-e-nāz meñ

aisā mire nasīb meñ likkhā gayā nahīñ

vo bhī mirā chalan thā ki shīrāza-e-hayāt

bikhrā kuchh is tarah ki sameTā gayā nahīñ

ab bhī khanak nahīñ hai naved-e-bahār meñ

sehn-e-chaman se ḳhauf ḳhizāñ kā gayā nahīñ

ab kyā kareñ ḳhulūs-o-muravvat ke tazkire

hirs-o-havas se duur zamāna gayā nahīñ

har ik qadam pe sāya-e-ā'māl saath thā

koī 'adam ke shahr meñ tanhā gayā nahīñ

maiñ ḳhud-baḳhud banā huuñ tamāshā.iyoñ se pūchh

koī mujhe banā ke tamāshā gayā nahīñ

ab aap kyā kareñge madāvā-e-soz-e-ġham

manzar to ġham kā aap se dekhā gayā nahīñ

jazba-e-sabr-o-shukr mere kaam aa gayā

kyā thā jo mere baḳht meñ likkhā gayā nahīñ

sach to ye hai nasīb muāfiq nahīñ mirā

ai 'dard' de ke vo mujhe dhokā gayā nahīñ

kis kis ko aaj roiye kya kya gaya nahin

kahte hain log ghar koi luTa gaya nahin

kahte hain jis ko hasil-e-bahbudi-e-hayat

aisa koi sawal uThaya gaya nahin

mera bhi zikr-e-KHair ho har bazm-e-naz mein

aisa mere nasib mein likkha gaya nahin

wo bhi mera chalan tha ki shiraaza-e-hayat

bikhra kuchh is tarah ki sameTa gaya nahin

ab bhi khanak nahin hai nawed-e-bahaar mein

sehn-e-chaman se KHauf KHizan ka gaya nahin

ab kya karen KHulus-o-murawwat ke tazkire

hirs-o-hawas se dur zamana gaya nahin

har ek qadam pe saya-e-a'mal sath tha

koi 'adam ke shahr mein tanha gaya nahin

main KHud-baKHud bana hun tamashaiyon se puchh

koi mujhe bana ke tamasha gaya nahin

ab aap kya karenge madawa-e-soz-e-gham

manzar to gham ka aap se dekha gaya nahin

jazba-e-sabr-o-shukr mere kaam aa gaya

kya tha jo mere baKHt mein likkha gaya nahin

sach to ye hai nasib muafiq nahin mera

ai 'dard' de ke wo mujhe dhoka gaya nahin