kis kis ko zer-e-ab hawa ki talash hai

kis kis ko zer-e-āb havā kī talāsh hai

kahtā hai har habāb havā kī talāsh hai

is vāste bigāḌ rahā huuñ ġhazal ko maiñ

ehsās ko ḳharāb havā kī talāsh hai

sar par paḌī huī haiñ zamāne kī saḳhtiyāñ

is gard ko janāb havā kī talāsh hai

har satr-e-zindagī pe hai likkhā huā ghuTan

merā sabhī nisāb havā kī talāsh hai

kab se bhaTak rahā hai mirī chashm-e-habs meñ

kyā tujh ko bhī ai ḳhvāb havā kī talāsh hai

fatvā-garān-e-shahr-e-sitam meñ hameñ 'zamān'

marham du'ā sharāb havā kī talāsh hai

kis kis ko zer-e-ab hawa ki talash hai

kahta hai har habab hawa ki talash hai

is waste bigaD raha hun ghazal ko main

ehsas ko KHarab hawa ki talash hai

sar par paDi hui hain zamane ki saKHtiyan

is gard ko janab hawa ki talash hai

har satr-e-zindagi pe hai likkha hua ghuTan

mera sabhi nisab hawa ki talash hai

kab se bhaTak raha hai meri chashm-e-habs mein

kya tujh ko bhi ai KHwab hawa ki talash hai

fatwa-garan-e-shahr-e-sitam mein hamein 'zaman'

marham du'a sharab hawa ki talash hai