kis ko hai waqt ki puchhe wo haqiqat teri

kis ko hai vaqt ki pūchhe vo haqīqat terī

jāntā kaun nahīñ ab ye musībat terī

ḳhush-nasībī hai jo rahte haiñ tire paas aksar

is bahāne unheñ hotī hai ziyārat terī

terī zulfoñ se koī ġhair ulajhtā hai agar

āñkheñ ho jaatī haiñ tab misl-e-qayāmat terī

mujh ko afsos hai tū ne mujhe samjhā hī nahīñ

mujh ko har moḌ pe pesh aa.ī zarūrat terī

ab to ehsās ye hotā hai ki har pal ai dost

ḳhaak meñ mujh ko milā Dālegī nafrat terī

raaz maiñ terā sañbhālūñgā huuñ zinda jab tak

merī āñkhoñ meñ jo rakkhī hai amānat terī

vo bhī kahtā hai ye 'minhāj' bichhaḌ kar mujh se

ḳhvāb meñ roz nazar aatī hai sūrat terī

kis ko hai waqt ki puchhe wo haqiqat teri

jaanta kaun nahin ab ye musibat teri

KHush-nasibi hai jo rahte hain tere pas aksar

is bahane unhen hoti hai ziyarat teri

teri zulfon se koi ghair ulajhta hai agar

aankhen ho jati hain tab misl-e-qayamat teri

mujh ko afsos hai tu ne mujhe samjha hi nahin

mujh ko har moD pe pesh aai zarurat teri

ab to ehsas ye hota hai ki har pal ai dost

KHak mein mujh ko mila Dalegi nafrat teri

raaz main tera sanbhaalunga hun zinda jab tak

meri aankhon mein jo rakkhi hai amanat teri

wo bhi kahta hai ye 'minhaj' bichhaD kar mujh se

KHwab mein roz nazar aati hai surat teri