کس کو کھویا ہے کس کو پایا ہے

کس کو کھویا ہے کس کو پایا ہے

بارہا یہ خیال آیا ہے

زندگی کی کراہتوں پر بھی

ہم کو آیا تو پیار آیا ہے

لطف مرنے میں ہے نہ جینے میں

موڑ ایسا بھی ایک آیا ہے

وعدہ کر وعدہ کچھ تو بات بنے

کس نے وعدہ بھلا نبھایا ہے

آگ اپنی ہو یا پرائی ہو

اپنے اشکوں سے خود بجھایا ہے

زندگی کی سیاہ راتوں کو

تیری یادوں سے جگمگایا ہے

بوجھ اٹھتا نہیں ہے کیا کہئے

ہم نے سو سو طرح اٹھایا ہے

کارواں ہے نہ کارواں کا غبار

خضر نے گل یہ کیا کھلایا ہے

ہم نے حسرتؔ سکون کی خاطر

دشمنوں کو گلے لگایا ہے