کس کو معلوم ہوئی عزت و شان بلبل

کس کو معلوم ہوئی عزت و شان بلبل

کون ہے گل کے سوا مرتبہ دان بلبل

گوش گل نے نہ سنا شور فغان بلبل

اے صبا کیا ہوئی تاثیر زبان بلبل

آئی کیا فصل خزاں اڑ گئے مرغان چمن

مٹ گیا صورت گل نام و نشان بلبل

دید لیلیٰ کے لئے شرط ہے چشم مجنوں

صفت گل کو ہے درکار زبان بلبل

ہو گیا برہم اسی سے تو مزاج اس گل کا

جا بجا تھا مرے دیواں میں بیان بلبل

گاتے ہیں میری غزل مرغ خوش الحان چمن

ان کو آتا ہے مزہ ہے یہ زبان بلبل

شب کو آتا ہے جو محفل میں وہ گل اے اکبرؔ

ہم کو پروانوں پہ ہوتا ہے گمان بلبل