کس کو ملی ہے غم سے رہائی ہنسنا اور ہنسانا کیا

کس کو ملی ہے غم سے رہائی ہنسنا اور ہنسانا کیا

صحن چمن میں پھول کا یارو کھلنا کیا مرجھانا کیا

کچھ بھی زمانہ کہے زباں سے مجبور و مظلوم کی بات

جس نے مٹا لی اپنی ہستی اس کا بھلا افسانہ کیا

جام کو چوما بھلا دیا غم جھوم اٹھے مخمور ہوئے

چلتے پھرتے پی لیتے ہیں اپنے لیے مے خانہ کیا

دو دل جب بھی کہیں ملے ہیں دنیا جل کر راکھ ہوئی

پیار میں سب کچھ جلتے دیکھا شمع کیا پروانہ کیا

وقت مصیبت کون کسی کے کام یہاں آیا ہے خضرؔ

ہم نے سب کو دیکھ لیا ہے اپنا کیا بیگانہ کیا