kis ko mili hai gham se rihai hansna aur hansana kya

kis ko milī hai ġham se rihā.ī hañsnā aur hañsānā kyā

sehn-e-chaman meñ phuul kā yaaro khilnā kyā murjhānā kyā

kuchh bhī zamāna kahe zabāñ se majbūr-o-mazlūm kī baat

jis ne miTā lī apnī hastī us kā bhalā afsāna kyā

jaam ko chūmā bhulā diyā ġham jhuum uTThe maḳhmūr hue

chalte phirte pī lete haiñ apne liye mai-ḳhāna kyā

do dil jab bhī kahīñ mile haiñ duniyā jal kar raakh huī

pyaar meñ sab kuchh jalte dekhā sham' kyā parvāna kyā

vaqt-e-musībat kaun kisī ke kaam yahāñ aayā hai 'ḳhizr'

ham ne sab ko dekh liyā hai apnā kyā begāna kyā

kis ko mili hai gham se rihai hansna aur hansana kya

sehn-e-chaman mein phul ka yaro khilna kya murjhana kya

kuchh bhi zamana kahe zaban se majbur-o-mazlum ki baat

jis ne miTa li apni hasti us ka bhala afsana kya

jam ko chuma bhula diya gham jhum uTThe maKHmur hue

chalte phirte pi lete hain apne liye mai-KHana kya

do dil jab bhi kahin mile hain duniya jal kar rakh hui

pyar mein sab kuchh jalte dekha sham' kya parwana kya

waqt-e-musibat kaun kisi ke kaam yahan aaya hai 'KHizr'

hum ne sab ko dekh liya hai apna kya begana kya