کس کو قریب جانتا ہے کون دور ہے

کس کو قریب جانتا ہے کون دور ہے

کیا عقل کی خطا ہے کہ دل کا قصور ہے

ہم نے کہا نہ تم نے سنا ایک واقعہ

پڑھ لکھ سکے بھی کیا کہ جو بین السطور ہے

لمحات وصل بھی ہیں شب ہجر کی طرح

جتنا ہوا قریب وہ اتنا ہی دور ہے

ہم کو ہے شوق دید ہم اہل نظر ہوئے

یہ تیرگی ہمارے لئے ظل نور ہے

تصویر جلوہ ساز مصور ہے اس طرح

میری نگاہ منتظر کوہ طور ہے

ہیں محفل رموز میں اسرارؔ جلوہ گر

حیراں نہ ہو کہ عقل جنوں کے حضور ہے