kis ko sunaen aur kahen kya kisi se hum

kis ko sunā.eñ aur kaheñ kyā kisī se ham

sab kuchh luTā ke baiTh ga.e haiñ abhī se ham

apnī hī kuchh ḳhabar hai na duniyā se vāsta

rahte haiñ sab ke saath magar ajnabī se ham

yuuñ to charāġh ham ne bahut se jalā.e the

mahrūm phir bhī rahte rahe raushnī se ham

asrār-e-husn-o-ishq ko zāhir bhī kyoñ kareñ

kahne kī baat ho to kaheñ har kisī se ham

har sher apnā ā.ina-e-husn-o-ishq hai

bas lutf lete rahte haiñ ab shā.irī se ham

pahle zabān-e-ġhair meñ karte the shā.irī

urdu meñ sher kahte haiñ ab āgahī se ham

dil itnā bujh gayā hai ġhamoñ se ki ai 'azīz'

jiine ko jī rahe haiñ magar be-dilī se ham

kis ko sunaen aur kahen kya kisi se hum

sab kuchh luTa ke baiTh gae hain abhi se hum

apni hi kuchh KHabar hai na duniya se wasta

rahte hain sab ke sath magar ajnabi se hum

yun to charagh hum ne bahut se jalae the

mahrum phir bhi rahte rahe raushni se hum

asrar-e-husn-o-ishq ko zahir bhi kyon karen

kahne ki baat ho to kahen har kisi se hum

har sher apna aaina-e-husn-o-ishq hai

bas lutf lete rahte hain ab shairi se hum

pahle zaban-e-ghair mein karte the shairi

urdu mein sher kahte hain ab aagahi se hum

dil itna bujh gaya hai ghamon se ki ai 'aziz'

jine ko ji rahe hain magar be-dili se hum