کس کو سناؤں حال دل بے قرار کا

کس کو سناؤں حال دل بے قرار کا

ملتا نہیں ہے کوئی بشر اعتبار کا

کیسے گزر وہاں ہو سکون و قرار کا

جھگڑا پڑا ہوا ہو جہاں نور و نار کا

نقد حیات ان کی ہے بے مصرف و فضول

جن کو خیال ہی نہیں اپنے وقار کا

اجڑا ہے جب سے میرا نشیمن ہوں مطمئن

خطرہ ہی ختم ہو گیا برق و شرار کا

ہے دن کی روشنی تو کبھی رات کا سماں

جاری ہے سلسلہ یوں ہی لیل و نہار کا

توصیف اس کی میری زباں سے ہو کیا بیاں

یکجا ہوا ہے حسن عروس بہار کا

بے بال و پر ہے پھر بھی بنایا ہے آشیاں

مقدور اور کیا تھا غریب الدیار کا

جان بہار بن کے تصور میں آ گئے

جب بھی چھڑا ہے تذکرہ فصل بہار کا

تخلیق کائنات کے اسباب کچھ بھی ہوں

خاورؔ یہ ایک شغل ہے پروردگار کا