kis liye chup hun wazahat bhi nahin kar sakta

kis liye chup huuñ vazāhat bhī nahīñ kar saktā

maiñ mohabbat meñ shikāyat bhī nahīñ kar saktā

ek ik kar ke parindoñ ne to hijrat kar lī

peḌ huuñ peḌ to hijrat bhī nahīñ kar saktā

kyā mujhe saañs bhī lene kī ijāzat nahīñ hai

kyā maiñ ik aur mohabbat bhī nahīñ kar saktā

kyā zamāna hai ki is ahd-e-ziyāñ meñ koī shaḳhs

apne bachchoñ ko nasīhat bhī nahīñ kar saktā

kaun sā ḳhauf rag-o-pai meñ samāyā hai ki ab

maiñ burā.ī kī mazammat bhī nahīñ kar saktā

ab kisī ashk ko kyā aañkh meñ rakkhā jaa.e

ashk jo ġham kī hifāzat bhī nahīñ kar saktā

sāmnā ho to zabāñ dil kā nahīñ detī saath

kuchh batāne kī maiñ himmat bhī nahīñ kar saktā

sāneha ye hai use mujh se judā honā hai

aur sitam ye ki maiñ ruḳhsat bhī nahīñ kar saktā

kis liye chup hun wazahat bhi nahin kar sakta

main mohabbat mein shikayat bhi nahin kar sakta

ek ek kar ke parindon ne to hijrat kar li

peD hun peD to hijrat bhi nahin kar sakta

kya mujhe sans bhi lene ki ijazat nahin hai

kya main ek aur mohabbat bhi nahin kar sakta

kya zamana hai ki is ahd-e-ziyan mein koi shaKHs

apne bachchon ko nasihat bhi nahin kar sakta

kaun sa KHauf rag-o-pai mein samaya hai ki ab

main burai ki mazammat bhi nahin kar sakta

ab kisi ashk ko kya aankh mein rakkha jae

ashk jo gham ki hifazat bhi nahin kar sakta

samna ho to zaban dil ka nahin deti sath

kuchh batane ki main himmat bhi nahin kar sakta

saneha ye hai use mujh se juda hona hai

aur sitam ye ki main ruKHsat bhi nahin kar sakta