kis liye jaante hain ghar ko ye be-ghar saya

kis liye jānte haiñ ghar ko ye be-ghar saaya

jab falak aap kiye baiThā hai un par saaya

baaqī mar kar bhī rahā hijr kā mujh par saaya

dhuup andar mirī turbat ke hai bāhar saaya

ye bhī muḳhbir na kahīñ ġhair kā hove hushiyār

pīchhā kartā hai dam-e-vasl barābar saaya

uf re saḳhtī shab-e-hijrāñ kī agar aañkh lage

bain uTh uTh ke kiyā kartā hai shab bhar saaya

ye kisī jin kā nahīñ shaiḳh ki utre tum se

ham liye phirte haiñ ik huur kā ḳhud par saaya

kyoñ na is darja ho 'hāris' kī zabāñ meñ garmī

ḳhud shah-e-mulk-e-suḳhan ne kiyā un par saaya

kis liye jaante hain ghar ko ye be-ghar saya

jab falak aap kiye baiTha hai un par saya

baqi mar kar bhi raha hijr ka mujh par saya

dhup andar meri turbat ke hai bahar saya

ye bhi muKHbir na kahin ghair ka howe hushiyar

pichha karta hai dam-e-wasl barabar saya

uf re saKHti shab-e-hijran ki agar aankh lage

bain uTh uTh ke kiya karta hai shab bhar saya

ye kisi jin ka nahin shaiKH ki utre tum se

hum liye phirte hain ek hur ka KHud par saya

kyon na is darja ho 'haaris' ki zaban mein garmi

KHud shah-e-mulk-e-suKHan ne kiya un par saya