kis liye phirta hun tanha na kisi ne puchha

kis liye phirtā huuñ tanhā na kisī ne pūchhā

kyuuñ kahīñ jī nahīñ lagtā na kisī ne pūchhā

zehn āvāra dil āvāra nazar āvāra

kaise is haal ko pahuñchā na kisī ne pūchhā

kaun hai aayā hai kis des se kis se milne

sab ne dekhā magar itnā na kisī ne pūchhā

jaane kyā kahte agar pūchhtā ahvāl koī

ḳhair ye bhī huā achchhā na kisī ne pūchhā

be-ta.alluq hue 'rūhī' ajab andāz se log

kis pe kyā hādsa guzrā na kisī ne pūchhā

kis liye phirta hun tanha na kisi ne puchha

kyun kahin ji nahin lagta na kisi ne puchha

zehn aawara dil aawara nazar aawara

kaise is haal ko pahuncha na kisi ne puchha

kaun hai aaya hai kis des se kis se milne

sab ne dekha magar itna na kisi ne puchha

jaane kya kahte agar puchhta ahwal koi

KHair ye bhi hua achchha na kisi ne puchha

be-talluq hue 'ruhi' ajab andaz se log

kis pe kya hadsa guzra na kisi ne puchha