kis liye phirte hain ye shams o qamar donon sath

kis liye phirte haiñ ye shams o qamar donoñ saath

kis ko ye DhūñDte haiñ barhana-sar donoñ saath

kaisī yā-rab ye havā sub.h-e-shab-e-vasl chalī

bujh gayā dil mirā aur sham-e-sahar donoñ saath

ba.ad mere na rahā ishq kī manzil kā nishāñ

miT ga.e rāh-rau o rāhguzar donoñ saath

ai junūñ dekh isī sahrā meñ akelā huuñ maiñ

rahte jis dasht meñ haiñ ḳhauf-o-ḳhatar donoñ saath

mujh ko hairat hai shab-e-aish kī kotāhī par

yā ḳhudā aa.e the kyā shām-o-sahar donoñ saath

us ne pherī nigah-e-nāz ye ma.alūm huā

khiñch gayā siine se tiir aur jigar donoñ saath

ġham ko dī dil ne jagah dil ko jagah pahlū ne

ek goshe meñ kareñge ye basar donoñ saath

is ko rokūñ maiñ ilāhī ki sambhālūñ us ko

ki taḌapne lage dil aur jigar donoñ saath

naaz baḌhtā gayā baḌhte ga.e juuñ juuñ gesū

balki lene lage ab zulf o kamar donoñ saath

tujh se matlab hai nahīñ duniyā o uqbā se ġharaz

tū nahīñ jab to ujaḌ jaa.eñ ye ghar donoñ saath

baat sunñā na kisī chāhne vaale kī kabhī

kaan meñ phūñk rahe haiñ ye guhar donoñ saath

āñdhiyāñ aah kī bhī ashk kā sailāb bhī hai

dete haiñ dil kī ḳharābī kī ḳhabar donoñ saath

kyā kahūñ zohra o ḳhurshīd kā aalam ai 'nazm'

nikle ḳhalvat se jūñhī vaqt-e-sahar donoñ saath

kis liye phirte hain ye shams o qamar donon sath

kis ko ye DhunDte hain barhana-sar donon sath

kaisi ya-rab ye hawa subh-e-shab-e-wasl chali

bujh gaya dil mera aur sham-e-sahar donon sath

baad mere na raha ishq ki manzil ka nishan

miT gae rah-rau o rahguzar donon sath

ai junun dekh isi sahra mein akela hun main

rahte jis dasht mein hain KHauf-o-KHatar donon sath

mujh ko hairat hai shab-e-aish ki kotahi par

ya KHuda aae the kya sham-o-sahar donon sath

us ne pheri nigah-e-naz ye malum hua

khinch gaya sine se tir aur jigar donon sath

gham ko di dil ne jagah dil ko jagah pahlu ne

ek goshe mein karenge ye basar donon sath

is ko rokun main ilahi ki sambhaalun us ko

ki taDapne lage dil aur jigar donon sath

naz baDhta gaya baDhte gae jun jun gesu

balki lene lage ab zulf o kamar donon sath

tujh se matlab hai nahin duniya o uqba se gharaz

tu nahin jab to ujaD jaen ye ghar donon sath

baat sunna na kisi chahne wale ki kabhi

kan mein phunk rahe hain ye guhar donon sath

aandhiyan aah ki bhi ashk ka sailab bhi hai

dete hain dil ki KHarabi ki KHabar donon sath

kya kahun zohra o KHurshid ka aalam ai 'nazm'

nikle KHalwat se junhi waqt-e-sahar donon sath