kis liye sab ko ajab bojh laga sar apna

kis liye sab ko ajab bojh lagā sar apnā

le ke mahfil meñ jo pahuñchā maiñ kaTā sar apnā

haath lapke to bahut pahuñche na gardan tak bhī

na magar ahl-e-nazar the na jhukā sar apnā

rasm phir rasm hai Thahrā hai lahū hī jo suhāg

chamak ai teġh-e-havā le ye rahā sar apnā

sab havā bhuul ga.ī sarkashī-o-sha-zorī

ik zarā dosh-e-havā par jo uḌā sar apnā

ham ne Thokar bhī agar khaa.ī to ghar aa kar hī

apnī dahlīz hī se jā ke lagā sar apnā

bas ki ab dekhnā hai apne lahū se rishta

ḳhvāb meñ dekhtā huuñ tan se judā sar apnā

kam se kam bhuul ga.e vaar to shamshīroñ ko

'talḳh' jaane do bhulā do jo gayā sar apnā

kis liye sab ko ajab bojh laga sar apna

le ke mahfil mein jo pahuncha main kaTa sar apna

hath lapke to bahut pahunche na gardan tak bhi

na magar ahl-e-nazar the na jhuka sar apna

rasm phir rasm hai Thahra hai lahu hi jo suhag

chamak ai tegh-e-hawa le ye raha sar apna

sab hawa bhul gai sarkashi-o-sha-zori

ek zara dosh-e-hawa par jo uDa sar apna

hum ne Thokar bhi agar khai to ghar aa kar hi

apni dahliz hi se ja ke laga sar apna

bas ki ab dekhna hai apne lahu se rishta

KHwab mein dekhta hun tan se juda sar apna

kam se kam bhul gae war to shamshiron ko

'talKH' jaane do bhula do jo gaya sar apna