kis liye sahra ke muhtaj-e-tamasha hojiye

kis liye sahrā ke muhtāj-e-tamāshā hojiye

chaak kiije siine ko aur aaphī sahrā hojiye

kushta-e-lab ho ke kiije jāvedāñ ab zindagī

kyuuñ abas minnat-kash-e-ḳhizr-o-masīhā hojiye

chashm-e-ahval sab ko dekhe hai ziyāda aap se

ain bīnā.ī hai gar is tarah biinā hojiye

kab talak sar-gashta rahiye din ko misl-e-gard-bād

raat ko juuñ sham.a jalne ko muhayyā hojiye

is qadar ham dil-girafta haiñ ki mushkil hai bahut

us ke band-e-jāma vā hone pe bhī vā hojiye

mujh se ye mahjūbī aur dushman se aisā iḳhtilāt

sharm kiije bevafā.ī meñ na rusvā hojiye

aanā yuuñ tevrī chaḌhā.e muñh banā.e fā.eda

gar yahī sūrat hai mat tashrīf-farmā hojiye

bul-havas kā yuuñ hadaf kiije nishāna tiir kā

ġhāfil apnī qadar se be-dard itnā hojiye

juuñ jaras bām-o-dar-e-har-ḳhāna se uTThegā shor

mat safar se hashr barpā sāz-e-suhhā hojiye

ḳhāna vīrāñ kar ke dīvāne bane tis par 'razā'

kuchh na ho.e phir bhalā kyā kījiye kyā hojiye

kis liye sahra ke muhtaj-e-tamasha hojiye

chaak kije sine ko aur aaphi sahra hojiye

kushta-e-lab ho ke kije jawedan ab zindagi

kyun abas minnat-kash-e-KHizr-o-masiha hojiye

chashm-e-ahwal sab ko dekhe hai ziyaada aap se

ain binai hai gar is tarah bina hojiye

kab talak sar-gashta rahiye din ko misl-e-gard-baad

raat ko jun shama jalne ko muhayya hojiye

is qadar hum dil-girafta hain ki mushkil hai bahut

us ke band-e-jama wa hone pe bhi wa hojiye

mujh se ye mahjubi aur dushman se aisa iKHtilat

sharm kije bewafai mein na ruswa hojiye

aana yun tewri chaDhae munh banae faeda

gar yahi surat hai mat tashrif-farma hojiye

bul-hawas ka yun hadaf kije nishana tir ka

ghafil apni qadar se be-dard itna hojiye

jun jaras baam-o-dar-e-har-KHana se uTThega shor

mat safar se hashr barpa saz-e-suhha hojiye

KHana viran kar ke diwane bane tis par 'raza'

kuchh na hoe phir bhala kya kijiye kya hojiye