kis mein hai ye majal teri aag se pare

kis meñ hai ye majāl tirī aag se pare

Daale koī dhamāl tirī aag se pare

jaise koī charāġh bichhaḌ jaa.e nuur se

merī vahī misāl tirī aag se pare

mujh ko parā.ī dhuup bhī bhaḌkā nahīñ sakī

aaya nahīñ ubaal tirī aag se pare

tā-umr tujh alaav ko rakkhūñgā mushta.il

guzre haiñ kitne saal tirī aag se pare

raushan hai sham.a-gāh-e-badan meñ chahār-sū

bujhne kā ehtimāl tirī aag se pare

miltā nahīñ kisī se mirī aag kā mizāj

rahtā huuñ pur-malāl tirī aag se pare

detā hai kaun aag parā.e charāġh ko

jalnā huā muhāl tirī aag se pare

ab jā ke merī raakh se chingāriyāñ talāsh

ye ishq thā vabāl tirī aag se pare

phirtā huuñ sahn-e-dasht meñ ātash-bajāñ magar

mujh pe rahā zavāl tirī aag se pare

mujh ko dhueñ kī dhund ne dhuñdlā ke rakh diyā

aa.egā kyoñ jamāl tirī aag se pare

tārīḳh kah rahī hai na.ī paud ke 'munīr'

kachche haiñ ḳhadd-o-ḳhāl tirī aag se pare

kis mein hai ye majal teri aag se pare

Dale koi dhamal teri aag se pare

jaise koi charagh bichhaD jae nur se

meri wahi misal teri aag se pare

mujh ko parai dhup bhi bhaDka nahin saki

aaya nahin ubaal teri aag se pare

ta-umr tujh alaw ko rakkhunga mushtail

guzre hain kitne sal teri aag se pare

raushan hai shama-gah-e-badan mein chahaar-su

bujhne ka ehtimal teri aag se pare

milta nahin kisi se meri aag ka mizaj

rahta hun pur-malal teri aag se pare

deta hai kaun aag parae charagh ko

jalna hua muhaal teri aag se pare

ab ja ke meri rakh se chingariyan talash

ye ishq tha wabaal teri aag se pare

phirta hun sahn-e-dasht mein aatash-bajaan magar

mujh pe raha zawal teri aag se pare

mujh ko dhuen ki dhund ne dhundla ke rakh diya

aaega kyon jamal teri aag se pare

tariKH kah rahi hai nai paud ke 'munir'

kachche hain KHadd-o-KHal teri aag se pare