kis mein KHubi hai jalane mein ki jal jaane hain

kis meñ ḳhūbī hai jalāne meñ ki jal jaane haiñ

sham.a meñ soz ziyāda hai ki parvāne meñ

lazzat-e-dard ko ik ḳhaar mayassar na huā

dil kā kāñTā na nikālā gayā vīrāne meñ

mere pur-dard bayāñ ne mujhe marne na diyā

maut ko niiñd sī aa.ī mire afsāne meñ

āb-e-kausar to na thā chashm-e-siyah meñ terī

paḌ ga.ī jaan tujhe dekh ke dīvāne meñ

haq-parastī mirī ka.abe se sadā detī hai

dil meñ kar yaad ḳhudā baiTh ke but-ḳhāne meñ

ġham ġhalat kartā huuñ pī pī ke jigar ke aañsū

shabnamī mai hai mirī aañkh ke paimāne meñ

mujh ko jab sāqī-e-maġhrūr ne sāġhar na diyā

'auj' aañsū nikal aa.e mire maiḳhāne meñ

kis mein KHubi hai jalane mein ki jal jaane hain

shama mein soz ziyaada hai ki parwane mein

lazzat-e-dard ko ek KHar mayassar na hua

dil ka kanTa na nikala gaya virane mein

mere pur-dard bayan ne mujhe marne na diya

maut ko nind si aai mere afsane mein

aab-e-kausar to na tha chashm-e-siyah mein teri

paD gai jaan tujhe dekh ke diwane mein

haq-parasti meri kabe se sada deti hai

dil mein kar yaad KHuda baiTh ke but-KHane mein

gham ghalat karta hun pi pi ke jigar ke aansu

shabnami mai hai meri aankh ke paimane mein

mujh ko jab saqi-e-maghrur ne saghar na diya

'auj' aansu nikal aae mere maiKHane mein