kis munh se kahen gunah kya hain

kis muñh se kaheñ gunāh kyā haiñ

tauba hai rū-siyāh kyā haiñ

allāh hai afv karne vaalā

maiñ kyā huuñ mire gunāh kyā haiñ

ai dost tire gadā ke aage

kuchh bhī nahīñ bādshāh kyā haiñ

tum sā koī bad-chalan na hogā

hai hai āshiq tabāh kyā haiñ

gorī gorī hai un kī sūrat

us par gesū-e-siyāh kyā haiñ

chakkar maiñ haiñ shaiḳh-o-gabr dono

apne liye ḳhud tabāh kyā haiñ

dekhe koī hāl-e-ahl-e-duniyā

ye log bhī vaah vaah kyā haiñ

utreñ un se muqāble ko

aflāk pe mehr-o-māh kyā haiñ

dhūmeñ teġh-e-nigāh kī haiñ

tevar ai kaj-kulāh kyā haiñ

shāhid haiñ tire sitam ke lākhoñ

do-chār us ke gavāh kyā haiñ

allāh re un butoñ kī āñkheñ

kāfir jaadū nigāh kyā haiñ

kaT jā.egī umr-e-chand-roza

fikreñ shām-o-pagāh kyā haiñ

un kā to javāb hī nahīñ hai

māshā-allāh vaah kyā haiñ

ai dil ulfat ke mahkame meñ

qaazī kyā hai gavāh kyā haiñ

dil hai to ziyāda us se hoñge

ye nāla-o-ashk-o-āh kyā haiñ

pahlū meñ nigār haath meñ jaam

is vaqt to bādshāh kyā haiñ

un kī aamad jo ai 'sabā' hai

sab matlab rū-ba-rāh kyā haiñ

kis munh se kahen gunah kya hain

tauba hai ru-siyah kya hain

allah hai afw karne wala

main kya hun mere gunah kya hain

ai dost tere gada ke aage

kuchh bhi nahin baadshah kya hain

tum sa koi bad-chalan na hoga

hai hai aashiq tabah kya hain

gori gori hai un ki surat

us par gesu-e-siyah kya hain

chakkar main hain shaiKH-o-gabr dono

apne liye KHud tabah kya hain

dekhe koi haal-e-ahl-e-duniya

ye log bhi wah wah kya hain

utren un se muqable ko

aflak pe mehr-o-mah kya hain

dhumen tegh-e-nigah ki hain

tewar ai kaj-kulah kya hain

shahid hain tere sitam ke lakhon

do-chaar us ke gawah kya hain

allah re un buton ki aankhen

kafir jadu nigah kya hain

kaT jaegi umr-e-chand-roza

fikren sham-o-pagah kya hain

un ka to jawab hi nahin hai

masha-allah wah kya hain

ai dil ulfat ke mahkame mein

qazi kya hai gawah kya hain

dil hai to ziyaada us se honge

ye nala-o-ashk-o-ah kya hain

pahlu mein nigar hath mein jam

is waqt to baadshah kya hain

un ki aamad jo ai 'saba' hai

sab matlab ru-ba-rah kya hain