kis ne badla naqsh-e-kohna dahr ki taswir ka

kis ne badlā naqsh-e-kohna dahr kī tasvīr kā

ye mukāfāt-e-'amal hai yā likhā taqdīr kā

jo kahoge dil pe likkhā jā.egā par dekhnā

harf tak miTtā nahīñ dil par likhī tahrīr kā

dāstān-e-'ishq merī hai zamāne se judā

qissa-e-lailā na hī koī fasāna hiir kā

maiñ asīr-e-zulf-e-jānāñ mujh ko āzādī kahāñ

silsila-dar-silsila hai silsila zanjīr kā

jis taraf dekheñ jamāl-e-yār hai jalva-faroz

ā.ina-dar-ā.ina 'aks ek hī tasvīr kā

ai dil-e-sad-chāk afsurda-o-pazhmurda na ho

hasratoñ ke din ga.e ab vaqt hai tā'mīr kā

qāfiya-paimā.iyāñ maqsūd-e-tuk-bandī nahīñ

dil meñ hai ik 'azm tere naam kī tash.hīr kā

kis ne badla naqsh-e-kohna dahr ki taswir ka

ye mukafat-e-'amal hai ya likha taqdir ka

jo kahoge dil pe likkha jaega par dekhna

harf tak miTta nahin dil par likhi tahrir ka

dastan-e-'ishq meri hai zamane se juda

qissa-e-laila na hi koi fasana hir ka

main asir-e-zulf-e-jaanan mujh ko aazadi kahan

silsila-dar-silsila hai silsila zanjir ka

jis taraf dekhen jamal-e-yar hai jalwa-faroz

aaina-dar-aina 'aks ek hi taswir ka

ai dil-e-sad-chaak afsurda-o-pazhmurda na ho

hasraton ke din gae ab waqt hai ta'mir ka

qafiya-paimaiyan maqsud-e-tuk-bandi nahin

dil mein hai ek 'azm tere nam ki tashhir ka