kis ne dekhe honge ab tak aise nae nirale patthar

kis ne dekhe hoñge ab tak aise na.e nirāle patthar

maiñ ne apne tāj-mahal meñ chunvā.e haiñ kaale patthar

jo hīroñ ke ruup meñ dar dar apne aañsū baañT rahe haiñ

un fan-kāroñ par pheñkeñge kab tak duniyā vaale patthar

jaane kaun the jin ko jīvan-rut se bhiik milī rañgoñ kī

apnī suunī jholī meñ to phūloñ ne bhī Daale patthar

maqtal kī be-rahm fasīleñ sar tak aa pahuñchī haiñ āḳhir

mere jism kī dīvāroñ se ab to koī haTā le patthar

pyaar tumhārā jhūTā hai aur jhūTā hai bhagvān bhī shāyad

varna kuchh to kahte būḌhe mandir ke rakhvāle patthar

apne apne naam ke ujle shīsh-mahal kī ḳhair manāo

har shohrat kī muTThī meñ haiñ rusvā.ī ke kaale patthar

ai dhanvāno tum kyā jaano zauq-e-ibādat qadr-e-parstish

tum sab hiire motī le lo kar do mire havāle patthar

'prem' is yug kī sāl-girah par aur bhalā kyā tohfa dete

chāñd kī dilkash dhartī se bhī ham ne DhūñDh nikāle patthar

kis ne dekhe honge ab tak aise nae nirale patthar

main ne apne taj-mahal mein chunwae hain kale patthar

jo hiron ke rup mein dar dar apne aansu banT rahe hain

un fan-karon par phenkenge kab tak duniya wale patthar

jaane kaun the jin ko jiwan-rut se bhik mili rangon ki

apni suni jholi mein to phulon ne bhi Dale patthar

maqtal ki be-rahm fasilen sar tak aa pahunchi hain aaKHir

mere jism ki diwaron se ab to koi haTa le patthar

pyar tumhaara jhuTa hai aur jhuTa hai bhagwan bhi shayad

warna kuchh to kahte buDhe mandir ke rakhwale patthar

apne apne nam ke ujle shish-mahal ki KHair manao

har shohrat ki muTThi mein hain ruswai ke kale patthar

ai dhanwano tum kya jaano zauq-e-ibaadat qadr-e-parstish

tum sab hire moti le lo kar do mere hawale patthar

'prem' is yug ki sal-girah par aur bhala kya tohfa dete

chand ki dilkash dharti se bhi hum ne DhunDh nikale patthar