kis ne sada lagai ki hairan kar diya

kis ne sadā lagā.ī ki hairān kar diyā

mujh se mirī rihā.ī kā elaan kar diyā

vo to burā hī maan ga.e ham ne jis ghaḌī

un ke diye sharāp ko vardān kar diyā

ab tak tire savāl se hotā thā jī udaas

ab ke mujhe javāb ne halkān kar diyā

bigḌe hue navāb haiñ pahle hī dil miyāñ

aur tum ne in ko ishq kā sultān kar diyā

tere qiyām se rahā ābād shahr-e-dil

hijrat ne terī phir ise vīrān kar diyā

us lā-zavāl husn pe īmān laa.e ham

kāfir kī ik nazar ne musalmān kar diyā

ye mere sang hone se pahle kī baat hai

patthar ko puuj puuj ke bhagvān kar diyā

ro kar kiyā visāl ko pur-lutf aur phir

ḳhush rah ke ham ne hijr kā nuqsān kar diyā

us ne hisār-e-shab kī baḌhā.ī hai chaukasī

ham ne bhī jugnuoñ ko nigahbān kar diyā

sursā sī phailtī huī aadam kī bhuuk ne

jangal miTā.e shahr bayābān kar diyā

kis ne sada lagai ki hairan kar diya

mujh se meri rihai ka elan kar diya

wo to bura hi man gae hum ne jis ghaDi

un ke diye sharap ko wardan kar diya

ab tak tere sawal se hota tha ji udas

ab ke mujhe jawab ne halkan kar diya

bigDe hue nawab hain pahle hi dil miyan

aur tum ne in ko ishq ka sultan kar diya

tere qiyam se raha aabaad shahr-e-dil

hijrat ne teri phir ise viran kar diya

us la-zawal husn pe iman lae hum

kafir ki ek nazar ne musalman kar diya

ye mere sang hone se pahle ki baat hai

patthar ko puj puj ke bhagwan kar diya

ro kar kiya visal ko pur-lutf aur phir

KHush rah ke hum ne hijr ka nuqsan kar diya

us ne hisar-e-shab ki baDhai hai chaukasi

hum ne bhi jugnuon ko nigahban kar diya

sursa si phailti hui aadam ki bhuk ne

jangal miTae shahr bayaban kar diya