kis ne ye socha tha haidar aisa bhi ho sakta hai

kis ne ye sochā thā 'haidar' aisā bhī ho saktā hai

jis ko pyaar samajh baiThe vo dhokā bhī ho saktā hai

ġhairoñ ke hāthoñ meñ ḳhanjar DhūñD rahe ho āḳhir kyoñ

jis ne kiyā barbād hameñ vo apnā bhī ho saktā hai

sāñseñ lenā bas ho alāmat jiine kī lāzim to nahīñ

dil ke andar jhāñk ke dekho murda bhī ho saktā hai

saare jahāñ meñ baat mohabbat kī jo kartā phirtā hai

us ke ghar nafrat kā añdherā phailā bhī ho saktā hai

terī mahfil tere bande ho jitnā bhī shor magar

ham mahfil meñ aa.eñ to sannāTā bhī ho saktā hai

phir se kisī ko dil meñ basā.ūñ phir se kisī ke dard sahūñ

ye dil kā āñgan hai suunā suunā bhī ho saktā hai

aag lagāne se pahle ai kaash vo itnā soch bhī le

ye jo jalā hai ye merā sarmāya bhī ho saktā hai

'haidar' saarā haal maiñ apnā kaise ġhazal meñ likh Dālūñ

fikr mujhe bas ye hai koī rusvā bhī ho saktā hai

kis ne ye socha tha 'haidar' aisa bhi ho sakta hai

jis ko pyar samajh baiThe wo dhoka bhi ho sakta hai

ghairon ke hathon mein KHanjar DhunD rahe ho aaKHir kyon

jis ne kiya barbaad hamein wo apna bhi ho sakta hai

sansen lena bas ho alamat jine ki lazim to nahin

dil ke andar jhank ke dekho murda bhi ho sakta hai

sare jahan mein baat mohabbat ki jo karta phirta hai

us ke ghar nafrat ka andhera phaila bhi ho sakta hai

teri mahfil tere bande ho jitna bhi shor magar

hum mahfil mein aaen to sannaTa bhi ho sakta hai

phir se kisi ko dil mein basaun phir se kisi ke dard sahun

ye dil ka aangan hai suna suna bhi ho sakta hai

aag lagane se pahle ai kash wo itna soch bhi le

ye jo jala hai ye mera sarmaya bhi ho sakta hai

'haidar' sara haal main apna kaise ghazal mein likh Dalun

fikr mujhe bas ye hai koi ruswa bhi ho sakta hai