kis pe qabu jo tujhi pe nahin qabu apna

kis pe qaabū jo tujhī pe nahīñ qaabū apnā

kis se ummīd hameñ jab na huā tū apnā

jām-e-mai dekh ke jaatā rahā qaabū apnā

laḌkhaḌātā huuñ pakaḌ le koī baazū apnā

nik.hat-e-gul bahut itrātī huī phirtī hai

vo kahīñ khol bhī deñ turra-e-gesū apnā

us ne phir kar bhī na dekhā ki ye hai kaun balā

ham ko thā zom ki chal jā.egā jaadū apnā

jis ko samjhe ho vahī chiiz nahīñ muddat se

ham dikhā deñge kabhī chiir ke pahlū apnā

par-e-parvāz nikalne de qafas meñ sayyād

kaam degā yahī TuuTā huā baazū apnā

mil ga.e ḳhaak meñ dar par tire itnā baiThe

is riyāzat pe bhī ab tak na huā tū apnā

ġham nahīñ jām-e-tilākār uThā rakh saaqī

kyā ġharaz ham ko salāmat rahe chullū apnā

chaukḌī bhuul ke muñh takte haiñ mujh vahshī ke

aake is paañv pe sar rakhte haiñ aahū apnā

kaun ai tūl-e-shab-e-ġham tirā jhagḌā rakkhe

aaj qissa hī kiye dete haiñ yaksū apnā

nik.hat-e-ḳhuld-e-barīñ phail ga.ī kosoñ tak

vo nahā kar jo sukhāne lage gesū apnā

lillāhil-hamd kudūrat nahīñ rahne paatī

muñh dhulā detā hai har sub.h ko aañsū apnā

shādī o ġham ke raheñge yahī ragḌe jhagḌe

qissa jis vaqt talak hogā na yaksū apnā

ġham meñ parvāna-e-marhūm ke thamte nahīñ ashk

sham.a ai sham.a zarā dekh to muñh tū apnā

be-adab mus.haf-e-ruḳhsār pe jhuk paḌte haiñ

rakhiye shānoñ pe zarā gher ke gesū apnā

sīna-e-tañg se ghabrā ke gayā dil to gayā

muñh dikhā.e na mujhe ab ye siyah-rū apnā

phañsne vaalā thā phañsā aa ke tirī zulfoñ meñ dil

ba-ḳhudā is meñ nahīñ jurm sar-e-mū apnā

shaam se jeb meñ ik talḳh davā rakkhī hai

aaj qissa hī kiye dete haiñ yaksū apnā

vahm o idrāk o ḳhayālāt o dil o ḳhvāhish-e-dil

sab to apne haiñ magar kyuuñ nahīñ qaabū apnā

'shād' samjhāte haiñ kyuuñ ġhair liyā kyā un kā

chashm-e-tar apnī hai jaan apnī hai aañsū apnā

kis pe qabu jo tujhi pe nahin qabu apna

kis se ummid hamein jab na hua tu apna

jam-e-mai dekh ke jata raha qabu apna

laDkhaData hun pakaD le koi bazu apna

nikhat-e-gul bahut itraati hui phirti hai

wo kahin khol bhi den turra-e-gesu apna

us ne phir kar bhi na dekha ki ye hai kaun bala

hum ko tha zom ki chal jaega jadu apna

jis ko samjhe ho wahi chiz nahin muddat se

hum dikha denge kabhi chir ke pahlu apna

par-e-parwaz nikalne de qafas mein sayyaad

kaam dega yahi TuTa hua bazu apna

mil gae KHak mein dar par tere itna baiThe

is riyazat pe bhi ab tak na hua tu apna

gham nahin jam-e-tilakar uTha rakh saqi

kya gharaz hum ko salamat rahe chullu apna

chaukDi bhul ke munh takte hain mujh wahshi ke

aake is panw pe sar rakhte hain aahu apna

kaun ai tul-e-shab-e-gham tera jhagDa rakkhe

aaj qissa hi kiye dete hain yaksu apna

nikhat-e-KHuld-e-barin phail gai koson tak

wo naha kar jo sukhane lage gesu apna

lillahil-hamd kudurat nahin rahne pati

munh dhula deta hai har subh ko aansu apna

shadi o gham ke rahenge yahi ragDe jhagDe

qissa jis waqt talak hoga na yaksu apna

gham mein parwana-e-marhum ke thamte nahin ashk

shama ai shama zara dekh to munh tu apna

be-adab mushaf-e-ruKHsar pe jhuk paDte hain

rakhiye shanon pe zara gher ke gesu apna

sina-e-tang se ghabra ke gaya dil to gaya

munh dikhae na mujhe ab ye siyah-ru apna

phansne wala tha phansa aa ke teri zulfon mein dil

ba-KHuda is mein nahin jurm sar-e-mu apna

sham se jeb mein ek talKH dawa rakkhi hai

aaj qissa hi kiye dete hain yaksu apna

wahm o idrak o KHayalat o dil o KHwahish-e-dil

sab to apne hain magar kyun nahin qabu apna

'shad' samjhate hain kyun ghair liya kya un ka

chashm-e-tar apni hai jaan apni hai aansu apna