kis qadar dilruba-numa hai dil

kis qadar dilrubā-numā hai dil

ḳhāna-e-ġhair ho gayā hai dil

har ghaḌī kyuuñ na zalzale meñ rahe

mash.had-e-hasrat-o-vafā hai dil

maut bhī sahl kuchh nahīñ apnī

kis liye tāqat-āzmā hai dil

maslahat is meñ ho na koī kaash

dushman-e-jān ho gayā hai dil

sab se lag chalne kī huī hai kho

kis qadar sarf-e-āshnā hai dil

shaiḳh-e-san.āñ kā yaad hai qissa

saḳht kāfir burī balā hai dil

apnī hālat meñ mubtalā huuñ aap

dil-rubā jaañ hai jāñ-rubā hai dil

balbe vāmāñdgī kī tez ravī

jaise jaane pe aa gayā hai dil

kis jafā-kār kī vafā hai jaañ

kis sitam-kash kā mudda'ā hai dil

terī ulfat kā naqd dāġh-e-jigar

merī hasrat kā ḳhūñ-bahā hai dil

kahiye kis se lagā liyā laggā

ai 'qalaq' kyuuñ ke lag chalā hai dil

kis qadar dilruba-numa hai dil

KHana-e-ghair ho gaya hai dil

har ghaDi kyun na zalzale mein rahe

mashhad-e-hasrat-o-wafa hai dil

maut bhi sahl kuchh nahin apni

kis liye taqat-azma hai dil

maslahat is mein ho na koi kash

dushman-e-jaan ho gaya hai dil

sab se lag chalne ki hui hai kho

kis qadar sarf-e-ashna hai dil

shaiKH-e-sanan ka yaad hai qissa

saKHt kafir buri bala hai dil

apni haalat mein mubtala hun aap

dil-ruba jaan hai jaan-ruba hai dil

balbe wamandgi ki tez rawi

jaise jaane pe aa gaya hai dil

kis jafa-kar ki wafa hai jaan

kis sitam-kash ka mudda'a hai dil

teri ulfat ka naqd dagh-e-jigar

meri hasrat ka KHun-baha hai dil

kahiye kis se laga liya lagga

ai 'qalaq' kyun ke lag chala hai dil