kis qadar maila dil ka darpan hai

kis qadar mailā dil kā darpan hai

aadmī aadmī kā dushman hai

kah rahī hai ye vaqt kī raftār

zindagī zindagī kā madfan hai

chāhte haiñ ki ek ho jaa.eñ

kyā kareñ dil hamārā dushman hai

ab sadāqat pe hai yaqīn kahāñ

jhuuT kā bolnā baḌā-pan hai

raqs uryāniyat kā hai har-sū

ahd-e-hāzir kā ye nayā-pan hai

ḳhair mere safar kī ho yā-rab

ham-safar aaj merā rahzan hai

baat jitnī baḌī ho sach ye hai

us meñ itnā hī khokhlā-pan hai

haath nafrat se kyoñ milāte ho

ye to zahrīle naag kā phan hai

tīrgī kā nahīñ hai ḳhauf mujhe

mere hāthoñ meñ un kā dāman hai

vo ḳhafā kyā hue ki ai 'anjum'

suunā suunā sā dil kā āñgan hai

kis qadar maila dil ka darpan hai

aadmi aadmi ka dushman hai

kah rahi hai ye waqt ki raftar

zindagi zindagi ka madfan hai

chahte hain ki ek ho jaen

kya karen dil hamara dushman hai

ab sadaqat pe hai yaqin kahan

jhuT ka bolna baDa-pan hai

raqs uryaniyat ka hai har-su

ahd-e-hazir ka ye naya-pan hai

KHair mere safar ki ho ya-rab

ham-safar aaj mera rahzan hai

baat jitni baDi ho sach ye hai

us mein itna hi khokhla-pan hai

hath nafrat se kyon milate ho

ye to zahrile nag ka phan hai

tirgi ka nahin hai KHauf mujhe

mere hathon mein un ka daman hai

wo KHafa kya hue ki ai 'anjum'

suna suna sa dil ka aangan hai