kis qadar unche mere dam hua karte the

kis qadar ūñche mire daam huā karte the

krishn mere the mire raam huā karte the

mere bhārat meñ faqīroñ kī sadā chaltī thī

suufī santoñ se yahāñ kaam huā karte the

kal talak pyaar hī maz.hab thā mire purkhoñ kā

kitnī āsānī se ham raam huā karte the

ab jo malba yahāñ nafrat kā nazar aatā hai

pyaar ke is meñ dar-o-bām huā karte the

ham to hindū bhī the muslim bhī the insān bhī the

sub.h jo hote vahī shaam huā karte the

ishq aayā to hameñ pyaar bhare naam mile

pyaar se pahle to be-nām huā karte the

ab to phūloñ se guzarte haiñ bachā kar dāman

jo 'munavvar' kabhī gulfām huā karte the

kis qadar unche mere dam hua karte the

krishn mere the mere ram hua karte the

mere bhaarat mein faqiron ki sada chalti thi

sufi santon se yahan kaam hua karte the

kal talak pyar hi mazhab tha mere purkhon ka

kitni aasani se hum ram hua karte the

ab jo malba yahan nafrat ka nazar aata hai

pyar ke is mein dar-o-baam hua karte the

hum to hindu bhi the muslim bhi the insan bhi the

subh jo hote wahi sham hua karte the

ishq aaya to hamein pyar bhare nam mile

pyar se pahle to be-nam hua karte the

ab to phulon se guzarte hain bacha kar daman

jo 'munawwar' kabhi gulfam hua karte the