kis se hun dad-KHwah koi dadras nahin

kis se huuñ dād-ḳhvāh koī dādras nahīñ

vo kushtanī huuñ maiñ ki kisī ko taras nahīñ

zāhid kisī visāl-e-sanam kī havas nahīñ

patthar kā but hai tū ki tujhe hiss-o-mas nahīñ

vo nā-tavāñ huuñ ki mire dil ko hai yaqīñ

āñdhī kī jhoñke chalte haiñ bād-e-nafas nahīñ

jab tak ki tum na aaoge ragḌūñgā eḌiyāñ

maiñ bhī huuñ saḳht-jān jo tum ko taras nahīñ

zabt-e-fuġhāñ se uzv-e-badan ghul chale tamām

maiñ kārvān-e-reg-e-ravāñ huuñ jaras nahīñ

duniyā kī ne.amatoñ se ye serī hai ruuh ko

bosa bhī yaar de to kahūñ maiñ havas nahīñ

kuchh to hamārī rone meñ taḳhfīf ho ga.ī

bārish jo agle saal thī ab kī baras nahīñ

parvānā-o-charāġh par aatā hai mujh ko rashk

kis tarah tum se uḌ ke lipaT jā.ūñ bas nahīñ

ai shahsavār us kā chamaknā dalīl hai

āhū-e-ḳhāvarī hai ye terā faras nahīñ

ham mai-kashoñ kī bazm meñ hai be-takallufī

kuchh dānā-hā-e-sub.ha-sifat pesh-o-pas nahīñ

betābiyāñ yahī haiñ to ik din najāt hai

sayyād yā to maiñ hī nahīñ yā qafas nahīñ

apne liye hai marg guloñ kī mafāriqat

hai gumbad-e-mazār hamārā qafas nahīñ

ai 'bahr' is maqām par aTkā hai jā ke dil

pā-e-ḳhayāl kī bhī jahāñ dastaras nahīñ

kis se hun dad-KHwah koi dadras nahin

wo kushtani hun main ki kisi ko taras nahin

zahid kisi visal-e-sanam ki hawas nahin

patthar ka but hai tu ki tujhe hiss-o-mas nahin

wo na-tawan hun ki mere dil ko hai yaqin

aandhi ki jhonke chalte hain baad-e-nafas nahin

jab tak ki tum na aaoge ragDunga eDiyan

main bhi hun saKHt-jaan jo tum ko taras nahin

zabt-e-fughan se uzw-e-badan ghul chale tamam

main karwan-e-reg-e-rawan hun jaras nahin

duniya ki neamaton se ye seri hai ruh ko

bosa bhi yar de to kahun main hawas nahin

kuchh to hamari rone mein taKHfif ho gai

barish jo agle sal thi ab ki baras nahin

parwana-o-charagh par aata hai mujh ko rashk

kis tarah tum se uD ke lipaT jaun bas nahin

ai shahsawar us ka chamakna dalil hai

aahu-e-KHawari hai ye tera faras nahin

hum mai-kashon ki bazm mein hai be-takallufi

kuchh dana-ha-e-subha-sifat pesh-o-pas nahin

betabiyan yahi hain to ek din najat hai

sayyaad ya to main hi nahin ya qafas nahin

apne liye hai marg gulon ki mafariqat

hai gumbad-e-mazar hamara qafas nahin

ai 'bahr' is maqam par aTka hai ja ke dil

pa-e-KHayal ki bhi jahan dastaras nahin