kis se milte hain kahan jate hain kya karte hain

kis se milte haiñ kahāñ jaate haiñ kyā karte haiñ

vasvase dil meñ ye rah rah ke uThā karte haiñ

farq karte haiñ kahāñ apne parā.e meñ kabhī

jo bhale hote haiñ vo sab kā bhalā karte haiñ

surḳh-rū hote haiñ vo kārgah-e-hastī meñ

faisla soch-samajh kar jo kiyā karte haiñ

dekh kar mujh ko badal jaate haiñ un ke tevar

dūsroñ se to vo hañs hañs ke milā karte haiñ

tere dīvāne guzar jaate haiñ hañste hañste

hosh-mandoñ ke jahāñ hosh uḌā karte haiñ

dekhne vāloñ kī kyā baat kaheñ vo ḳhud bhī

aa.ina dekh ke dil thaam liyā karte haiñ

kyā 'azīzoñ se hameñ koī shikāyat ho 'shakīl'

dushmanoñ ke liye bhī ham to du'ā karte haiñ

kis se milte hain kahan jate hain kya karte hain

waswase dil mein ye rah rah ke uTha karte hain

farq karte hain kahan apne parae mein kabhi

jo bhale hote hain wo sab ka bhala karte hain

surKH-ru hote hain wo kargah-e-hasti mein

faisla soch-samajh kar jo kiya karte hain

dekh kar mujh ko badal jate hain un ke tewar

dusron se to wo hans hans ke mila karte hain

tere diwane guzar jate hain hanste hanste

hosh-mandon ke jahan hosh uDa karte hain

dekhne walon ki kya baat kahen wo KHud bhi

aaina dekh ke dil tham liya karte hain

kya 'azizon se hamein koi shikayat ho 'shakil'

dushmanon ke liye bhi hum to du'a karte hain