kis sher mein sana-e-ruKH-e-mah-jabin nahin

kis sher meñ sanā-e-ruḳh-e-mah-jabīñ nahīñ

hai āsmān-e-husn ġhazal kī zamīñ nahīñ

kyūñkar kahūñ ki tum sā koī nāznīñ nahīñ

aajiz kuchh ai hasīñ mirā husn-āfrīñ nahīñ

ik ik suḳhan pe karte haiñ sau sau nahīñ nahīñ

kyā dūsrā jahān meñ tum sā hasīñ nahīñ

tujh sā jahāñ meñ ai yam-e-ḳhūbī hasīñ nahīñ

hai mauj-e-bahr-e-husn ye chīn-e-jabīñ nahīñ

achchhī nahīñ hai roz kī ai nāznīñ nahīñ

haañ haañ payām-e-vasl pe kījiye nahīñ nahīñ

ka.abe meñ but-kade meñ na dil meñ na arsh par

ai but kahāñ nihāñ hai ki miltā kahīñ nahīñ

jalva tirā kahāñ nahīñ ai āsmān-e-husn

jis jā falak na ho koī aisī zamīñ nahīñ

tanhā.ī-e-lahad se na ghabrā.eñ kis tarah

mūnis nahīñ shafīq nahīñ ham-nashīñ nahīñ

paimāñ-shikan jahāñ meñ na hogā huzūr sā

īfā-e-va.ada tum se agar ho yaqīñ nahīñ

kyā ham-sarī karegā tirī māh-e-āsmāñ

abrū nahīñ tirī sī tirī sī jabīñ nahīñ

maujūd jism meñ hai par āñkhoñ se hai nihāñ

tār-e-nigāh hai kamar-e-nāznīñ nahīñ

ro-ro ke hāl-e-ishq jo kahtā huuñ un se maiñ

hañs hañs ke mujh se kahte haiñ ham ko yaqīñ nahīñ

kis din unhoñ ne sīdhī tarah ham se baat kī

ulTī hamāre qatl pe kab āstīñ nahīñ

vo dil udaas hai ki jo ḳhālī hai ishq se

vīrāñ hai vo makān ki jis meñ makīñ nahīñ

bosa talab kiyā sar-e-mahfil jo yaar se

bolī hayā-e-rū-e-nigārīñ nahīñ nahīñ

māyūs vasl se dil-e-ġham-ghīñ hai kis qadar

har chand ham-kanār haiñ vo par yaqīñ nahīñ

āñkhoñ meñ nuur dil meñ ziyā siine meñ safā

jalva kahāñ kahāñ tirā ai nāznīñ nahīñ

kis sher mein sana-e-ruKH-e-mah-jabin nahin

hai aasman-e-husn ghazal ki zamin nahin

kyunkar kahun ki tum sa koi naznin nahin

aajiz kuchh ai hasin mera husn-afrin nahin

ek ek suKHan pe karte hain sau sau nahin nahin

kya dusra jahan mein tum sa hasin nahin

tujh sa jahan mein ai yam-e-KHubi hasin nahin

hai mauj-e-bahr-e-husn ye chin-e-jabin nahin

achchhi nahin hai roz ki ai naznin nahin

han han payam-e-wasl pe kijiye nahin nahin

kabe mein but-kade mein na dil mein na arsh par

ai but kahan nihan hai ki milta kahin nahin

jalwa tera kahan nahin ai aasman-e-husn

jis ja falak na ho koi aisi zamin nahin

tanhai-e-lahad se na ghabraen kis tarah

munis nahin shafiq nahin ham-nashin nahin

paiman-shikan jahan mein na hoga huzur sa

ifa-e-wada tum se agar ho yaqin nahin

kya ham-sari karega teri mah-e-asman

abru nahin teri si teri si jabin nahin

maujud jism mein hai par aankhon se hai nihan

tar-e-nigah hai kamar-e-naznin nahin

ro-ro ke haal-e-ishq jo kahta hun un se main

hans hans ke mujh se kahte hain hum ko yaqin nahin

kis din unhon ne sidhi tarah hum se baat ki

ulTi hamare qatl pe kab aastin nahin

wo dil udas hai ki jo KHali hai ishq se

viran hai wo makan ki jis mein makin nahin

bosa talab kiya sar-e-mahfil jo yar se

boli haya-e-ru-e-nigarin nahin nahin

mayus wasl se dil-e-gham-ghin hai kis qadar

har chand ham-kanar hain wo par yaqin nahin

aankhon mein nur dil mein ziya sine mein safa

jalwa kahan kahan tera ai naznin nahin