kis takalluf kis ehtimam se hum

kis takalluf kis ehtimām se ham

dil ko bahlā rahe haiñ shaam se ham

mai chhalaktī hai rind pyāse haiñ

phir bhī ḳhush haiñ is intizām se ham

ab gulistāñ meñ āshiyāñ bhī nahīñ

ab kahāñ jaa.eñ chhuT ke daam se ham

mil ga.ī jab nigāh saaqī se

ho ga.e be-niyāz jaam se ham

us kā har ik qusūr kar ke muaaf

mutma.in haiñ is intiqām se ham

bijliyāñ gir rahī haiñ gulshan par

luT rahe haiñ kis ehtimām se ham

tum jahāñ saath de nahīñ sakte

ab guzarte haiñ us maqām se ham

mehrbāñ the 'sa.īd' vo kal tak

aaj mahrūm haiñ salām se ham

kis takalluf kis ehtimam se hum

dil ko bahla rahe hain sham se hum

mai chhalakti hai rind pyase hain

phir bhi KHush hain is intizam se hum

ab gulistan mein aashiyan bhi nahin

ab kahan jaen chhuT ke dam se hum

mil gai jab nigah saqi se

ho gae be-niyaz jam se hum

us ka har ek qusur kar ke muaf

mutmain hain is intiqam se hum

bijliyan gir rahi hain gulshan par

luT rahe hain kis ehtimam se hum

tum jahan sath de nahin sakte

ab guzarte hain us maqam se hum

mehrban the 'said' wo kal tak

aaj mahrum hain salam se hum