kis tarah chain se dam bhar shab-e-furqat mein rahe

kis tarah chain se dam bhar shab-e-furqat meñ rahe

haa.e vo dil jo tire vasl kī hasrat meñ rahe

ham pas-e-marg bhī betābi-e-furqat meñ rahe

kabhī bāhar nikal aa.e kabhī turbat meñ rahe

tīrgī ab na hamārī shab-e-furqat meñ rahe

un kī zulfoñ meñ rahe ġhair kī turbat meñ rahe

kū-e-qātil meñ rahe ham ye aziyyat meñ rahe

nīm-bismil kī tarah shauq-e-shahādat meñ rahe

sub.h tak mujh se vo lipTā shab-e-vaslat meñ rahe

raat bhar aaj asar jazb-e-mohabbat meñ rahe

ġhair ke ashkoñ se dho.eñ to na dāman se chhuTe

itnī shoḳhī to mire ḳhuun kī rangat meñ rahe

rang halkā sā ho jin phūloñ kā vo pahno tum

kuchh takalluf bhī mirī jaan nazākat meñ rahe

ġhair ke saath vo jab phuul chaḌhāne aa.e

ham bahut dil ko sañbhāle hue turbat meñ rahe

terī sarkār meñ insāf yahī hai ai ishq

aarzū koī nikāle koī hasrat meñ rahe

zab.h ke vaqt vo zaanū pe mirā sar rakh le

kuchh to ārām kā pahlū bhī aziyyat meñ rahe

dam-e-ḳhanda dar-e-dandāñ kā agar aks paḌe

kuchh chamak bhī tire ruḳhsār kī rangat meñ rahe

lutf kyā paa.e haiñ hañs bol ke ham ne tum ne

gul-o-bulbul kī tarah bāġh-e-mohabbat meñ rahe

pūchheñ ahvāl mirā vo to ye kahnā qāsid

shab ko bechain bahut dard kī shiddat meñ rahe

dil na qaabū meñ rahā dekh ke sūrat un kī

ġhash se fursat huī ham ko to hairat meñ rahe

maiñ to ghabrā ke chalā huuñ kisī kūche kī taraf

bekasī aa ke mire ghar shab-e-furqat meñ rahe

bad-gumāñ huuñ maiñ dikhā.e na kisī ko sūrat

yā mire dil meñ rahe yā koī ḳhalvat meñ rahe

ruḳh-e-raushan pe jo tum zulf-e-siyah bikhrā do

phir na kuchh ḳhauf sahar kā shab-e-vaslat meñ rahe

baad murdan na jagah paa.ī kisī kūche meñ

muft barbād hasīnoñ kī mohabbat meñ rahe

mirī turbat se lipaT kar ye kisī kā kahnā

aap ab hashr talak vasl kī hasrat meñ rahe

zānū-e-hūr pe soyā kiye sar rakkhe hue

tire kushte bhī baḌī aish se turbat meñ rahe

baad marne ke khulī haiñ jo hamārī āñkheñ

hai ishāra tire dīdār kī hasrat meñ rahe

dhajjiyāñ shaiḳh kī is tarah uḌaao rindo

ek bhī taar na dastār-e-fazīlat meñ rahe

be-naqāb aa ke jo vo qabr pe ġham karte haiñ

chāhte haiñ ki mirī na.ash na turbat meñ rahe

kabhī dil thaam ke baiThe kabhī ghabrā uTThe

kyā kaheñ aap se kyūñkar shab-e-furqat meñ rahe

zab.h kartā koī zaanū se dabā kar siina

haa.e mushtāq-e-shahādat isī hasrat meñ rahe

ḳhush-nasībī hai jo phirtā huuñ tire kūche meñ

aarzū hai yahī gardish mirī qismat meñ rahe

ġhair kī qabr pe vo phuul chaḌhāyā kiye roz

aasrā ham bhī lagā.e hue turbat meñ rahe

hazrat-e-shaiḳh jo maiḳhāne meñ aa.eñ 'naushād'

ek bhī taar na dastār-e-fazīlat meñ rahe

kis tarah chain se dam bhar shab-e-furqat mein rahe

hae wo dil jo tere wasl ki hasrat mein rahe

hum pas-e-marg bhi betabi-e-furqat mein rahe

kabhi bahar nikal aae kabhi turbat mein rahe

tirgi ab na hamari shab-e-furqat mein rahe

un ki zulfon mein rahe ghair ki turbat mein rahe

ku-e-qatil mein rahe hum ye aziyyat mein rahe

nim-bismil ki tarah shauq-e-shahadat mein rahe

subh tak mujh se wo lipTa shab-e-waslat mein rahe

raat bhar aaj asar jazb-e-mohabbat mein rahe

ghair ke ashkon se dhoen to na daman se chhuTe

itni shoKHi to mere KHun ki rangat mein rahe

rang halka sa ho jin phulon ka wo pahno tum

kuchh takalluf bhi meri jaan nazakat mein rahe

ghair ke sath wo jab phul chaDhane aae

hum bahut dil ko sanbhaale hue turbat mein rahe

teri sarkar mein insaf yahi hai ai ishq

aarzu koi nikale koi hasrat mein rahe

zabh ke waqt wo zanu pe mera sar rakh le

kuchh to aaram ka pahlu bhi aziyyat mein rahe

dam-e-KHanda dar-e-dandan ka agar aks paDe

kuchh chamak bhi tere ruKHsar ki rangat mein rahe

lutf kya pae hain hans bol ke hum ne tum ne

gul-o-bulbul ki tarah bagh-e-mohabbat mein rahe

puchhen ahwal mera wo to ye kahna qasid

shab ko bechain bahut dard ki shiddat mein rahe

dil na qabu mein raha dekh ke surat un ki

ghash se fursat hui hum ko to hairat mein rahe

main to ghabra ke chala hun kisi kuche ki taraf

bekasi aa ke mere ghar shab-e-furqat mein rahe

bad-guman hun main dikhae na kisi ko surat

ya mere dil mein rahe ya koi KHalwat mein rahe

ruKH-e-raushan pe jo tum zulf-e-siyah bikhra do

phir na kuchh KHauf sahar ka shab-e-waslat mein rahe

baad murdan na jagah pai kisi kuche mein

muft barbaad hasinon ki mohabbat mein rahe

meri turbat se lipaT kar ye kisi ka kahna

aap ab hashr talak wasl ki hasrat mein rahe

zanu-e-hur pe soya kiye sar rakkhe hue

tere kushte bhi baDi aish se turbat mein rahe

baad marne ke khuli hain jo hamari aankhen

hai ishaara tere didar ki hasrat mein rahe

dhajjiyan shaiKH ki is tarah uDao rindo

ek bhi tar na dastar-e-fazilat mein rahe

be-naqab aa ke jo wo qabr pe gham karte hain

chahte hain ki meri nash na turbat mein rahe

kabhi dil tham ke baiThe kabhi ghabra uTThe

kya kahen aap se kyunkar shab-e-furqat mein rahe

zabh karta koi zanu se daba kar sina

hae mushtaq-e-shahadat isi hasrat mein rahe

KHush-nasibi hai jo phirta hun tere kuche mein

aarzu hai yahi gardish meri qismat mein rahe

ghair ki qabr pe wo phul chaDhaya kiye roz

aasra hum bhi lagae hue turbat mein rahe

hazrat-e-shaiKH jo maiKHane mein aaen 'naushad'

ek bhi tar na dastar-e-fazilat mein rahe