kis tarah kaTti hai gham ki sham dekha chahiye

kis tarah kaTtī hai ġham kī shaam dekhā chāhiye

dard kā hotā hai kyā anjām dekhā chāhiye

be-ḳhudī shorīdgī kā aaj un kī bazm meñ

kis ke sar aatā hai phir ilzām dekhā chāhiye

jalva-gar hai husn sad-nāz-o-adā se baam par

kaun phir aatā hai zer-e-dām dekhā chāhiye

phir vahī soz-e-tamannā phir vahī josh-e-junūñ

hashr terā ai dil-e-nākām dekhā chāhiye

kaun hotā hai bharī duniyā meñ ab apnā rafīq

iltifāt-e-gardish-e-ayyām dekhā chāhiye

tishna-lab uThtā huuñ un kī bazm se yā shād-kām

sabr kā miltā hai kyā in.aam dekhā chāhiye

naam ho dushnām ho anjām jo bhī ho 'ziyā'

le liyā hai baḌh ke ham ne jaam dekhā chāhiye

kis tarah kaTti hai gham ki sham dekha chahiye

dard ka hota hai kya anjam dekha chahiye

be-KHudi shoridgi ka aaj un ki bazm mein

kis ke sar aata hai phir ilzam dekha chahiye

jalwa-gar hai husn sad-naz-o-ada se baam par

kaun phir aata hai zer-e-dam dekha chahiye

phir wahi soz-e-tamanna phir wahi josh-e-junun

hashr tera ai dil-e-nakaam dekha chahiye

kaun hota hai bhari duniya mein ab apna rafiq

iltifat-e-gardish-e-ayyam dekha chahiye

tishna-lab uThta hun un ki bazm se ya shad-kaam

sabr ka milta hai kya inam dekha chahiye

nam ho dushnam ho anjam jo bhi ho 'ziya'

le liya hai baDh ke hum ne jam dekha chahiye