کس طرح کٹتی ہے غم کی شام دیکھا چاہئے

کس طرح کٹتی ہے غم کی شام دیکھا چاہئے

درد کا ہوتا ہے کیا انجام دیکھا چاہئے

بے خودی شوریدگی کا آج ان کی بزم میں

کس کے سر آتا ہے پھر الزام دیکھا چاہئے

جلوہ گر ہے حسن صد ناز و ادا سے بام پر

کون پھر آتا ہے زیر دام دیکھا چاہئے

پھر وہی سوز تمنا پھر وہی جوش جنوں

حشر تیرا اے دل ناکام دیکھا چاہئے

کون ہوتا ہے بھری دنیا میں اب اپنا رفیق

التفات گردش ایام دیکھا چاہئے

تشنہ لب اٹھتا ہوں ان کی بزم سے یا شاد کام

صبر کا ملتا ہے کیا انعام دیکھا چاہئے

نام ہو دشنام ہو انجام جو بھی ہو ضیاؔ

لے لیا ہے بڑھ کے ہم نے جام دیکھا چاہئے