kis tarah zinda rahenge hum tumhaare shahr mein

kis tarah zinda raheñge ham tumhāre shahr meñ

har taraf bikhre hue haiñ māh-pāre shahr meñ

jagmagātī raushnī meñ ye nahāte sīm-tan

jaise utre hoñ zamīñ par chāñd taare shahr meñ

misl-e-ḳhushbu-e-sabā phailī huī hai har taraf

gesu-e-bañgāl kī ḳhushbū hamāre shahr meñ

husn vāloñ ke sitam sah kar bhī ham zinda rahe

varna kitnoñ ke hue haiñ vaare nyāre shahr meñ

ye matā-e-pārsā.ī bhī na luT jaa.e kahīñ

de rahe haiñ dāvat-e-laġhzish nazāre shahr meñ

lahlahāte khet naddī gaañv kī pyārī havā

chhoḌ kar bekār aa.e ham tumhāre shahr meñ

apne hī zauq-e-jamāl-o-husn ke hāthoñ 'shamīm'

aaj ham badnām āvāra haiñ saare shahr meñ

kis tarah zinda rahenge hum tumhaare shahr mein

har taraf bikhre hue hain mah-pare shahr mein

jagmagati raushni mein ye nahate sim-tan

jaise utre hon zamin par chand tare shahr mein

misl-e-KHushbu-e-saba phaili hui hai har taraf

gesu-e-bangal ki KHushbu hamare shahr mein

husn walon ke sitam sah kar bhi hum zinda rahe

warna kitnon ke hue hain ware nyare shahr mein

ye mata-e-parsai bhi na luT jae kahin

de rahe hain dawat-e-laghzish nazare shahr mein

lahlahate khet naddi ganw ki pyari hawa

chhoD kar bekar aae hum tumhaare shahr mein

apne hi zauq-e-jamal-o-husn ke hathon 'shamim'

aaj hum badnam aawara hain sare shahr mein