kis tawaqqoa pe sharik-e-gham-e-yaran honge

kis tavaqqo.a pe sharīk-e-ġham-e-yārāñ hoñge

yaad ham kis ko bhalā ai dil-e-nādāñ hoñge

raunaq-e-bazm bahut ab bhī suḳhan-dāñ hoñge

un meñ kyā ham se bhī kuchh soḳhta-sāmāñ hoñge

ham pe jo biit ga.e biit ga.ī biit ga.ī

kyā kahīñ aap suneñge to pashemāñ hoñge

yaad ik ġham hai ki fariyād fusūñ hai ki junūñ

dard ke rishte haiñ mushkil se numāyāñ hoñge

tham ga.e ashk ki āñkhoñ meñ chamak lauT aa.e

ye diye shaam Dhalegī to farozāñ hoñge

yaas kī raat meñ har aas ne dam toḌ diyā

jaane kab sub.h ke āsār numāyāñ hoñge

tū salāmat ki tirī bazm meñ ai arz-e-vatan

zindagī hai to kabhī ham bhī ġhazal-ḳhvāñ hoñge

haañ kabhī to nazar ā.eñge 'nazar' vo galiyāñ

jin meñ ḳhurshīd ka.ī ab bhī ḳhirāmāñ hoñge

kis tawaqqoa pe sharik-e-gham-e-yaran honge

yaad hum kis ko bhala ai dil-e-nadan honge

raunaq-e-bazm bahut ab bhi suKHan-dan honge

un mein kya hum se bhi kuchh soKHta-saman honge

hum pe jo bit gae bit gai bit gai

kya kahin aap sunenge to pasheman honge

yaad ek gham hai ki fariyaad fusun hai ki junun

dard ke rishte hain mushkil se numayan honge

tham gae ashk ki aankhon mein chamak lauT aae

ye diye sham Dhalegi to farozan honge

yas ki raat mein har aas ne dam toD diya

jaane kab subh ke aasar numayan honge

tu salamat ki teri bazm mein ai arz-e-watan

zindagi hai to kabhi hum bhi ghazal-KHwan honge

han kabhi to nazar aaenge 'nazar' wo galiyan

jin mein KHurshid kai ab bhi KHiraman honge