کس واسطے گلہ کریں ان کا کسی سے ہم

کس واسطے گلہ کریں ان کا کسی سے ہم

روٹھی ہے ہم سے زندگی اور زندگی سے ہم

ہم ہیں وفا شعار زمانے تو دیکھ لے

دنیائے دل لٹاتے ہیں ہم اپنی خوشی سے ہم

اس بے رخی کا تیری کہیں کھل نہ جائے راز

یوں دوستی کئے ہیں تیری دشمنی سے ہم

حد روٹھنے کی ہو چکی اب مان جاؤ تم

گھبرا کے رو نا دیں کہیں اس دل لگی سے ہم

اس آستاں پہ سجدے کی لذت کو کیا کہیں

اب تو نہ باز آئیں گے اس بندگی سے ہم

ثاقبؔ جب ان پہ جان محبت میں کی نثار

تب لذت آشنا ہوئے اس عاشقی سے ہم