kis wahm mein asir tere mubtala hue

kis vahm meñ asiir tire mubtalā hue

kab ahl-e-shauq dām-e-vafā se rihā hue

āzād ho ke aur bhī be-dast-o-pā hue

kis dard-e-lā-ilāj meñ ham mubtalā hue

mañDlā rahe the jin ke saroñ par kulāġh o buum

vo faizyāb-e-sāya-e-bāl-e-humā hue

dil-dādgān-e-bādiya-e-sarsar-o-sumūm

shahzādgān-e-mulk-e-nasīm-o-sabā hue

karte na the jo sāhil o dariyā meñ imtiyāz

kashtī bhañvar meñ aa.ī to vo nāḳhudā hue

rasta dikhā sakā na jinheñ nūr-e-āftāb

jalne lage charāg to vo rahnumā hue

pā-mardi-e-yaqīñ se jo mahrūm haiñ vo log

apne rafīq-e-rāh hue bhī to kyā hue

kis shaan se ga.e haiñ shahīdān-e-kū-e-yār

qātil bhī haath uThā ke sharīk-e-duā hue

yaksāni-e-hayāt se ghabrā gayā hai dil

muddat guzar ga.ī koī tūfāñ bapā hue

koshish thī farz ham ne bhī kī lekin is ke ba.ad

apne tamām kaam supurd-e-ḳhudā hue

kis wahm mein asir tere mubtala hue

kab ahl-e-shauq dam-e-wafa se riha hue

aazad ho ke aur bhi be-dast-o-pa hue

kis dard-e-la-ilaj mein hum mubtala hue

manDla rahe the jin ke saron par kulagh o bum

wo faizyab-e-saya-e-baal-e-huma hue

dil-dadgan-e-baadiya-e-sarsar-o-sumum

shahzadgan-e-mulk-e-nasim-o-saba hue

karte na the jo sahil o dariya mein imtiyaz

kashti bhanwar mein aai to wo naKHuda hue

rasta dikha saka na jinhen nur-e-aftab

jalne lage charag to wo rahnuma hue

pa-mardi-e-yaqin se jo mahrum hain wo log

apne rafiq-e-rah hue bhi to kya hue

kis shan se gae hain shahidan-e-ku-e-yar

qatil bhi hath uTha ke sharik-e-dua hue

yaksani-e-hayat se ghabra gaya hai dil

muddat guzar gai koi tufan bapa hue

koshish thi farz hum ne bhi ki lekin is ke baad

apne tamam kaam supurd-e-KHuda hue